LALAU ARI AKU : ANANG MAYUH JAKO, PAJU KA PENGIDUP NUAN EMPU

Dalam pengidup tu, mayuh mensia semina pandai bejako. Semua pengawa orang nadai betul peda mata sida. Penyalah enggau penyilap orang dipeda enggau terang tang penyalah enggau penyilap diri empu dipelalai ka. Rambai jako "Anang mayuh jako. paju ka diri empu" ngingatka kitai anang kelalu kiruh ka pengidup orang, anang kelalu gagit berandau ka pengurang orang tang paju ka aja pengidup diri empu. Tilik pengurang diri empu, adu ka enggau manah-manah, ngambi pengidup kitai tau berinsur manah ari sehari ke sehari.

Ketegal kelalu kiruh ka pengidup orang, bisi sekeda ari kitai, duduk bejam-jam enggau bala ka sama cap enggau kitai semina bejako ka hal enda menuku. Utai dikerandau ka berulang-ulang tang nadai mai penguntung ngagai diri empu. Ketegal ulah ka baka nyak, kerja nyau tertanggur serta nadai ngenatai ka hasil. Orang ka dikerandau ka kitai nguna jam ka bisi tiap-tiap ari ngemansang ka pengidup diri. Ketegal kelalu ka berandau ka orang sampai nyau “body shaming”,  gamal orang, buk orang, baju orang, pemesai tubuh orang nyau nyadi ka batang randau. Ulah ka baka tu enti dipajak ka, nadai sekali-kali mai pemaju ngagai pengidup diri enggau bansa.

Kitai diada ka dunya semua sama. Pengelebih enggau pengurang ditentuka kitai empu. Runding kitai mesti betul ia nyak deka mansang ke mua ngambi ka enda tinggal ari orang bukai. Anang ngerusak ka pengidup diri enggau pengawa ka nadai mai penyenang enggau pengelantang ngagai pengidup kitai. Tau kitai berandau enggau bala kaban aba kedai kopi tang utai dikerandau ubah. Berandau ka chara ngemansang ka pengidup. Berandau ka pengawa ka patut digaga dikena nambah ka pemisi ruang bilik. Berandau ka baka ni chara ngansak bala anak rindu belajar ngambi ka pandai baka bansa bukai. Tauka, berandau ka chara ngemansang ka rumah panjai ka endur kitai diau. Randau ka betul tau mai pemujur serta pemansang ngagai pengidup.

Kitai mesti berunding baka ni chara ngemaju ka diri empu. Anang bejako kelalu mayuh enti utai enda menuku serta nadai tuju. Semua mensia enda menyana. Penyilap orang ambi nyadi ka lalau ngagai diri empu, ukai utai ka patut diketawa. Pengurang orang ambi ka banding enggau pengurang kitai empu awak ka kitai makin menyana ari sehari ke sehari. Petara enda tinduk meda pengawa enggau ulah kitai. Orang ka enda mantul ati serta bagas ngereja pengawa sigi diberkat Petara. Ari nya pengidup sida nadai penanggor, mudah gerah utai ulih. Taja enda kaya tang nadai utai kurang ba pengidup sida. Orang ka mayuh jako, kiruh ka pengidup orang, rindang belama-lama enggau ulah ka baka nyak datai ka runding pan nyau enda betul. Pengujung ia, sida nadai utai ulih. Pengidup nyau jengap-jengap laban semua utai digaga enda datai ba pengujung ketegal jam mayuh tebasau. 

Pemintar Berunding Nentu ka Pemujur Pengidup Kitai

Pengidup ka mujur bepangai aba runding siko-siko mensia. Nyak meh kitai ari mit diansak apai indai ke sekula ngambi ka nemu berunding enggau manah maya umur udah datai aba adan endur kitai badu bepangai aba sida lalu ngeluan ka pengidup diri empu.  Penemu ka diperajar kitai di sekula sigi beguna dikena kitai berunding ngatur pengidup diri empu. Orang ka nemu berunding taja enda sekula tinggi, ia ulih ngatur singkang pejalai nitih ka orang bukai enggau lantang serta mujur. Taja kerja bekuli tang ketegal ka nemu berunding sida tau niri negi ka kompeni diri empu. Ari nyak sida ulih ngadu ka rumah tangga enggau manah. Ari nyak mega sida ulih ngadu ka jalai pengidup bala anak sida enggau meruan. Orang ka pandak runding, juluk ati sida selalu tepantup datai ka nyau madai nyadi pisa telih bepedi. Sida ukai enda bulih utai, sida bisi pengawa serta bisi kerja begaji baka orang. Tang utai ulih selalu diayah enggau bebeli ka utai sengapa. Duit dikena berami nyau ngelui ari gaji datai ka nyau berutang. Ulah sida selalu ngujung ka sida empu tusah. Pengidup nyau pecah belah. Rumah tangga  enda meruan diintu. Belaya enda ngelapang ka ari. Bala anak nyau enda dipeduli. Pengidup ka baka tok nyadi ketegal ka nadai runding.

Orang ka nadai runding tok tusah ka diputar ka penemu laban sida nitih ka penemu diri empu. Enti bisi 10 iko sida ka baka tok, angka siko tauka dua iko aja mending ka jako ajar. Sida ka bukai nyak nadai nguna penemu kitai ketegal runding sida udah nyelai. Aku selalu meda bala anakbiak sekula ka pandak runding, maya pom satu datai pom tiga, sida cukup manah. Tang udah pom 4, nyau nemu bepangan enggau orang indu tauka orang laki, sida jauh ninggal ka diri. Sida selalu enda datai sekula. Jako ajar bala pengajar pan enda didinga. Bisi sekeda ka nyau belaki bebini. Pengujung pengidup sida sigi udah ditemu. Taja sida anak orang kaya tauka menyana, pengeraja apai indai ukai nyak tan enti nuan nadai chara dikena nambah ka ia. Pengudah dua tiga taun ka jadi, udah bisi anak, ketegal runding maya ka belaki bebini suba kelalu pandak, udah penanggur datai, kempang ati muai laki, muai bini serta muai anak diri empu. Nyak meh aku selalu mesan ngagai bala anakbiak, kita datai ka sekula ukai semina ngiga pemandai tang penemu diterima ari bala pengajar tau mai muan berunding badas sebedau ngaga pengawa ka ngenusah nuan empu.

Runding kitai selalu alah laban mata datai ka kitai makit orang bukai bebeli ka barang lalui ngujung ka kitai empu tusah. Orang meli kereta HILUX, kitai pan meli taja kitai nemu kitai enda cukup duit dikena mayar kereta bebulan-bulan. Ketegal enggai alah ari orang keno ko jako, kitai nyau ngenusah ka diri empu. Runding ka tau ‘munuh’ pengidup diri empu ia nyak runding begedi tau ka cemburu ngagai orang bukai. Kitai selalu enda nyamai ati meda orang lebih mujur, lebih pandai, tauka lebih pemisi ari kitai. Kitai nyau nadai pengawa bukai, tiap-tiap ari berunding ka chara deka ngelabuh ka ia. Salah seleka jako tau jadi ka peransang kitai deka ngelabuh ka ia. Ketegal begedi, jauh ka deka ngampun ka kaban tang sanggup ngena cara ka enda manah kena ngemuas ka ati ngambi ia labuh lalu enda ulih angkat berdiri agi. Runding ka baka tok meh ka selalu nyekat kitai mansang ka mua baka orang. Ni enda, baru tudah ka niki, bisi aja penyalah aba mata lalu orang ka pandak runding lalu mai orang bukai ka sama runding enggau ia beserakup ngelabuh ka tudah. Ka pengujung, sapa rugi? Ia rugi, nuan pan rugi. Bansa kitai alu bedau jengap-jengap enda mansang-mansang ketegal penemu ka salah.

Udah Bulih Pemutus Periksa SPM Ka Mujur Terus Nyambung Pelajar, Anang Badu, Semadi Enda Ulih Nadai Ko Jako, Giga Meh Jalai Ka Bukai

Aku selalu madah ngagai bala anakbiak ka diajar aku, enti sida udah bulih pemutus periksa ka manah, terus ka pelajar laban umur agi biak. Anang badu ngapa. Aku mega selalu bepesan enti nerus ka pelajar anang milih sengapa, minta tolong bala cikgu milih kursus ka manah serta cun enggau pemutus periksa ka diulih sida. Aku nyamai ati laban sida selalu ninga jako taja sida ukai anak aku empu tang ketegal kasih aku nadai kala belampong ati bekunsi cerita ngambi tau nyadi ka cuan sida nerus ka pejalai pengidup. Sekandang ka diato, nadai ga sida enda ninga jako, sida selalu nanya ni ka manah lalu ni ka betul. Lebih ka meda sida endang mujur bulih kerja pengudah ngabis ka pelajar aba tikas degre aku berasai gaga ati. Taja sida ulai anak ada tang laban ka udah kelalu lelak nyedia ka sida ngambi bulih ka pemutus periksa SPM ka manah, aku enggau bala cikgu ka bukai sigi enda lembau bepesan. 

Bisi bala anakbiak aku madah, enda pandai ulih meh idup Cikgu Zul. Ila kami kerja ke laut. Aya aku nadai meh sekol, tang ia mayuh duit, ulih meli Hilux. 

Aku enda kala madah penemu sida salah tang aku madah laban aku nemu runding sida agi runding anakbiak, enti nuan udah belajar 11 tahun ari darjah satu datai form lima, udah nuan bulih pemutus periksa SPM ka manah, nuan enggai nerus ka perajar, badu tauka kerja, manah agi gak nuan badu tumu ari suba. Aku selalu ngajar sida, sigi amat orang ka bulih utai lalu kaya ukai semua bisi pelajar ka tinggi tang enti nuan bisi diploma tauka degree, cara nuan berunding ka pejalai pengidup diri empu tau lain mimit laban penemu ka diperajar ka nuan tentu ulih dikena nuan ngemansang ka diri empu enggau diri sebilik. Aku enda madah orang ka enda tinggi perajar pandak runding. Anang salah sangka. Maya aku pulai pemisi ka rumah panjai, aku ngiga penemu enggau semua orang laban penemu sida aba utai bukai jauh lebih manah ari runding aku. Ambi ka banding, maya ka manduk asi pulut di tebing ia, aku berajar enggau sida cara ngidup ka api, cara masuk ka beras pulut, cara naing ruas beras pulut, serta enggau mayuh macam utai ka bukai.

Peluang orang ka tinggi perajar enggau ka nadai nasib ulih nyambung pelajar ketegal pil aba pom 5 ke dudi ari sigi sama. Orang ka mujur enggau enda mujur dalam pengidup mayuh bepangai aba diri empu. Tang kitai anang nyangka utai tok tau sama sekandang tempoh 10 tahuka 20 taun tik deka datai. Dunya diato kelalu jampat berubah, lalu kitai sigi beguna ka penemu ka dipelajar ngambi ka kitai ulih mansang ka mua enggau lebih manah. Aku enda nemu leju ngelalu bala anakbiak aku, pilih meh jalai enggau betul laban jalai ka dipilih nuan udah nuan ngambi pemutus periksa pom lima, nyak meh nyadi penentu pengidup nuan tik deka datai. Aku laban ka nadai bisi kala ngasai ka pengidup ngelaung ka pelajar pengudah pom lima sigi madah lalu ngansak bala anakbiak ka diajar aku nyambung pelajar ka tikas lebih manah agi. 

Uji kitai meda bansa enggau menua orang ka udah maju endang selalu ngemerat ka pengawa sekula laban sida nemu penemu ka diulih ari sekula amat beguna dikena kitai jemah ila. Pelajar sekula sigi beguna ngagai kitai semua. Seagi-agi bisi peluang, terus ka pengingin ati deka belajar datai ka tikas degree, master, enggau PHD. Aku minta ampun ngagai sida ka udu ngeracun penemu bala anakbiak enggau jako ka munyi tok;

“Belajar tinggi pan empai temu nuan bulih kerja. Semina ngayah ka duit apai indai. Enti nuan bejual online pun bulih duit beratus-ratus ribu baka sida Youtuber. Nuan jual perengka kena nganta aja aba Shopee pan bulih RM300.00 sehari." jako sida nimbal. 

Jako ka munyi tok endang amat tang ukai semua ka betul-betul mujur nyadi Youtuber enggau TikToker kelebih bansa kitai. Laun tauka dudi, ujung-ujung nuan beguna ka pemandai sekula ga kena minta kerja. Laban aku ka cikgu, aku selalu nerima mesej tauka talipaun ari orang ka udah badu sekula 5 tahun datai 10 tahun udah, minta Sijil Badu Sekol. Sida madah kena minta kereja laban diato minta kereja beguna ka Sijil SPM tauka. Mayuh agi cerita ka bukai senentang enggau pengawa ka enggai nyambung perajar ketegal ka salah runding maya agi baik tang munyi ko jako sempama, nesal nadai ka datai sebedau kitai mutus ka runding tang nesal dapat maya kitai udah mutus ka runding lalu udah ngagai ka penusah nitih jalai ka salah. Aba penemu aku, anang badu berajar seagi-agi bisi peluang kelebih agi maya umur kitai agi biak. Jako orang kiba kanan sigi mayuh. Penemu siko-siko sigi mayuh. Jako enggau penemu orang kelebih agi orang ka segulai peniau enggau kitai sigi bisi nyangkut aba ati tang kitai tau nanya orang bukai dulu enti kitai nyau sekut dalam milih jako ni ka patut dititih, penemu ni ka patut dipilih. Peda meh pemujur bansa orang ka udah maju jauh ari kitai aba perajar sekula. Sida meh megai penatai pemisi dunya. Sida udah jauh ninggal ka kitai. Udah jauh nyingkang ari kitai. 

Ari nyak anang meh berunding, nadai guna nyambung perajar udah SPM. Enti nadai guna, nama meh kebuah bala apai indai nyau beambis duit ngansak anak sida berajar ngambi ngulih ka pemutus periksa ka manah. Nama kebuah perintah tauka kompeni nyedia ka tulung serta bantu ngagai anakbiak ka bulih pemutus periksa ka manah lalu nganjung sida berajar ke luar negeri. Aku empu, selalu diansak bala apai indai ngajar anak sida bebayar sebedau ari sida ngambi periksa SPM, ngambi ka bulih A+. Bala apai indai bansa tok (Ukai bansa kitai Iban) sanggup mayar tuisyen anak RM100 datai RM300.00 sebulan bagi siti subjek ngambi ka anak sida betul-betul sedia sebedau ngambi SPM. Nama kebuah? Sida nemu perajar sekula endang beguna ka anak sida. Tunda meh penemu sida. Anang salah sangka, aku enda  nganu sapa-sapa. 

Enti penemu aku betul, titih ka. Enti salah, enda ibuh diguna. Tang ketegal penyayau aku ka bansa diri empu kelebih agi bala menyadi enggau bala kaban ka ngelala aku nyak meh aku ngemansut ka penemu baka tok. Aku enda minta puji, jauh sekali deka madah ka utai ulih diri empu, tang aku deka ngigat ka bala anakbiak ka baru udah bulih pemutus periksa SPM, enti nuan salah pilih jalai ka ditujah sari tok, nuan deka nikal pulai baru ila enda mudah. Anang ketegal jako orang nuan nyau salah singkang pengidup. Enti nuan labuh, enda sida megai jari ngangkat ka nuan baru. Enti nuan teterap, nadai sida berumban niri ka nuan baru. Nuan meh ka besai tanggungjawab ngagai nuan empu, ukai orang bukai. 

Pengawa Dagang Cara Senang Ngulih Ka Penyenang Enggau Penyamai Pengidup

Aku berasai temegah ati meda bala anakbiak bansa Iban ka rebak baru nemu muka jalai pengidup enggau pengawa ka bedagang. Taja pan sida agi baru dalam pengawa ka baka tok tang aku nemu sida udah bisi runding ka manah ngambi ka ulih duduk sama baruh serta berdiri sama tinggi enggau bansa bukai. Taja pan enda ngelala sida tang dalam ati selalu besampi ngambil Tuhan ngemujur ka pengawa sida serta nambah ka untung sida dalam pengawa dagang. Aba penemu aku pengawa bedagang tok meh pengawa ka pemadu muntang dikena kitai ngiga pengidup. Ambi ka banding, bala sida ka bejual lauk aba Pasar Tamu, nyak meh pengawa ka cukup badas ari ka diau diri aba rumah panjai. Dunya diato nyau berubah, duit pan majak berega, ari nyak kitai Iban anang betuan ka bansa bukai belama-lama dalam pengidup. Diato angka kitai agi jauh di baruh tang aku percaya dalam 10 taun tauka 20 taun tik ka datai angka bisi supermarket Iban ba menua pelilih Kapit enggau Song tauka aba menua bukai.

Mesti Nemu Ngadu Ka Untung

Pengawa bedagang tok senang ngulih ka duit tang enti kitai pandak runding, untung berpuluh-puluh ribu tau nadai dipeda dalam kandang dua bulan. Kebuah pia, laban kitai mudah amo mata lalu ka beguai dipeda orang lawa-lawa. Aku minta ampun meh angka jako aku tok salah. Kitai ka bedagang anang kelalu alah enggau pengingin ati ngayah ka duit. Untung bedagang simpan belama datai ka kitai bisi mayuh cawangan. Sekandang ka lima taun bedagang, duit ka ulih kitai nyak ukai untung, duitnya modal tauka simpanan kena kitai ngering diri laban kitai enda nemu penusah datai nadai semaya. Ari nyak baka ni penguji datai, kitai tetap puh bedagang laban kitai bisi sedia ari mula-mula kitai bedagang. 

Mesti Nemu Nambat Ati Orang

Kitai ka bedagang bekaban enggau semua mensia. Ulah mensia sigi mayuh macam. Bisi ka datai ke kedai kitai semina meda-meda barang. Bisi sekeda datai enggau ulah ka enda manah. Tang anggap meh semua ulah mensia ka baka nyak penguji ati kitai. Anang nuan ngambi video lalu viral ka orang enggau jako tik enda manah serta renjan. Taja ati nuan pedih tat ka aja meh laban orang ka datai ba kedai nuan nyak enti sida meda nuan ngelalu ka sida enggau manah serta badas, pagila lusa maya ia bisi duit ia datai agi ke kedai nuan tauka ia akan madah ka orang bukai pemanah nuan. Nuan enda nemu ia nulung nuan ari belakang. Pemanah ulah enggau basa kitai tau ngelemi ka ati orang ka datai. 

Kualiti Barang Dijual Mesti Dijaga

Bala ka bejual ka pemakai mesti bisi pengelandik nyediaka pemakai 2 kali ganda lebih manah ari kedai bansa bukai. Kebuah pia, kitai tok baru dalam pengawa tok, ari nyak kitai mesti bisi penemu tik baru dikena narit ati orang ke kedai kitai. Ambi ka banding, enti nuan bisi menu Nasi Goreng Dabai, enti kedai bukai ngena 3 igi dabai, nuan tau ngena 6 igi serta tambahka enggau daging tauka udang. Rega orang nadai entu bekira enti pemakai nuan nyamai serta beresi. 

Anang Udu Meri Orang Free

Kitai bedagang tok enggau modal tik besai. Semua utai dijual kitai mesti bisi pulai ka penguntung. Ari nyak, menyadi kitai empu datai ke kedai pan bebayar. Kitai empu pan pia, enti bejual ka pemakai, anang nyau separuh utai ka dijual masuk perut kitai empu. Enti baka nyak baka ni ka tulih ka penguntung. Bala bakih tauka kaban datai ka kedai kitai anang nyau semua enda asuh bebayar. Sida patut nyukung bisnes nuan ngambi ka terus mujur datai belama ia. Ati anang kelalu siru serta mulut anang kelalu gerah nyebut "enda ibuh bayar, nadai ngawa". 

Penemu aku tok semina datai ari runding aku empu. Aku ukai orang bedagang, aku pengajar. Aku semina rindu ngemansut ka penemu ngambi ka bisi nambah ka penemu bukai ka bisi didinga tauka dibaca kitak. Aku arapka semua bansa kitai ka bedagang tau mujur dalam pengawa ngambi ka jemah ila bisi jutawan bansa Iban masuk aba list mensia ka pemadu kaya ba Sarawak, Malaysia, tauka Dunya! Ni nemu, nasib manuk aba taji enggau pengelandik ia bebintih, nasib mensia kitai enda nemu, laban pemintar enggau runding siko-siko nentu ka pemujur ia dalam semua pengawa.

PENEMU CIKGU ZUL : 7 PENEMU ARI AKU DIKENA NYAMBUT GAWAI DAYAK

Sari tok kena 26 ari bulan lima 2023. Enti kelia, maya tok meh kitai Iban enggau bansa Dayak ka bukai udah berancau puang aba rumah panjai. Aku agi ingat, ati cukup pengaga maya deka nyambut ari gawai. Sekayu-kayu rumah panjai kiruh nyedia ka diri begiga ka lauk, meresi ruang bilik, begaga ka kuih enggau mayuh macam pengawa. Maya nyak suba orang ka bejalai begiga ka duit aba menua jauh semua pulai, cukup gaga meda sida berangkut ka utai dibeli. Diato gawai nyau lain, sida ka biak nebah lagu datai ka nyau tuli pending ninga, bejoget ari siang datai ka malam, ngirup ai bisa. Nadai agi pengawa ngabas ai baka suba. Jauh amat berubah. Taja pia, ngambi ka kitai meruan likun nyambut gawai, aku deka meri 7 jako lalau ngagai bala ka selalu macha penemu aku.

Jako Lalau Lumur 1

Bejimat Aba Jalai Alun

Nyawa kitai mensia semina siti aja. Ari nyak jaga meh enggau manah-manah. Maya deriba kereta anang kelalu laju enggai ka bebadi aba jalai alun, kelebih agi enti orang ka enggau kitai nepan kereta bala anak enggau bini serta apai indai kitai empu. Bejimat meh deriba. Anang kelalu ka berumban datai ka rumah panjai tauka endur ka dituju. Jako ajar sida ka tuai, "jamah lubah amat meh datai". Enti pala bisi sebening ketegal ka ngirup ai tuak segelas dua, tau anang deriba, enggai ka ngenatai ka penusah ngagai diri empu. Anang kelalu nitih ka pengingin ati. Sayau ka diri empu serta sayau ka orang ka nganti penatai kitai di rumah. Awak ka sida nyambut penatai kitai enggau pengaga ukai nyambut penatai kitai enggau sabak serta air mata.

Jako Lalau Lumur 2

Anang Kelalu Rua Bebeli Ka Utai

Pengudah COVID-19, dunya nyau majak berubah, ekonomi nyau majak enda manah. Rega barang nyau majak niki. Pagila lusa kitai enda nemu rega utai dipakai. Diato rega telo aja udah manggai aba RM18.00 sepapan. Ari nyak, ubah cara kitai bebeli ka utai. Ati tik ka meli enda alah tunda tang kitai mesti bejaga-jaga serta selalu meda pemisi diri empu. Kitai enda ulih agi kelalu mayuh bebeli ka ai bisa taja pan kitai bisi duit tauka kerja ka menyana. Pia mega enggau utai dempa, baka begaga tauka bebeli ka kuih. Aku tok bejako enda ngasuh kita semua sumit tang sebedau bebeli ka barang di kena begawai, tilik enggau badas-badas pemisi diri empu. Kitai enda tau nunda tauka bepakit enggau orang bebeli ka barang. Penemu ka enda manah baka nyak tau ngenatai ka penusah ngagai kitai empu dudi ari ila.

Jako Lalau Lumur 3

Anang Ngerua Utai Dempa (Pemakai)

Aku arap nadai agi orang nyau betuku tauka betampik pangan diri enggau asi pulut, kasam, tauka jukut. Arapka nadai agi orang ngasuh orang bukai majak pemajak makai datai ka nyau mutah ketegal kelalu kenyang. Pia mega nadai agi orang bepantil ngirup sampai ai tuak nyau abis naya. Begagai enda salah tang anang sekali-kali ngayah ka utai dempa. Taja kitai bisi duit meli utai dempa ka mayuh, anang sekali-kali utai nyak nyau dikena betuku tauka nyau basi enda alah empa, ngujung ka dibuai pia aja. Sayau utai dempa digaga baka nyak. Enti dibeli, diempa abis enggau manah nadai hal. Anang diayah tauka dibuai.

Jako Lalau Lumur 4

Berami Badas Maya Gawai

Ari gawai meh ari enggau kitai betemu serta begulai enggau apai indai, bala menyadi, bala kaban, bala kitai serumah serta bala ka sama nyambut hari gawai. Maya tok meh kitai minta ampun ngagai orang enti bisi salah runding tauka salah penemu enggau pangan diri. Titih ka jako ajar Tuai Rumah. Maya ka mabuk terus tinduk, anang kucah-kucah nyebut utai enda menuku datai ka nyau ngasuh ati orang enda nyamai. Anang sekali-kali kitai belaya maya gawai laban hal ka baka tok ukai tuju kitai nyambut hari gawai. Enti nyema bisi salah runding tauka salah penemu, atur enggau manah. Penemu tik saru ulih diputar enggau runding tik badas.

Jako Lalau Lumur 5

Jimat-Jimat Maya Mansut Ka Penemu

Kitai ka datai ari menua jauh, ka bisi kerja menyana, serta bisi pemandai selalu dibasa bala ka diau mendam ba rumah panjai. Tang  kitai mesti nemu mai diri, anang kelalu balat mansut ka penemu tang ngemaruh ka sida laban sida andal amai ka kitai tau ulih ngiring sida enggau penemu ka badas. Anang meh sombong enggau bala ka begulai enggau kitai maya mit suba, taja pengidup jauh berubah, kitai mesti ingat belama asal penatai kitai. Maya mit suba sama-sama main rumah aba karangan, nyemerai berebut ka buah ensurai, ngeransar aba tanah lucak, mandi telanjai enggau mayuh agi ulah anakbiak rumah panjai. Enti kita meda utai enda manah tauka enda betul, padah enggau jako ka alus ngambi sida ulih ngubah diri empu.

Jako Lalau Lumur 6

Ngirup Ai Bisa Enggau Ai Tuak Enda Sama

Ai bisa tauka arak enda tau diirup kelalu mayuh laban tau ngacau pengerai kitai. Kitai tau ngirup tang anang kelalu balat, enggai ka mai penusah. Penyakit enda datai maya kitai ngirup, penyakit ketegai ngirup tok datai maya umur kitai nyau udah tuai. Enti ai tuak, angka manah laban digaga kitai empu serta beresi. Tang aba runding aku, tagang meh nyawa diri. Anang nyau melampin aja bersari-sari datai ka bala apai indai enggau bala menyadi ka gauk ka kitai pan enda ulih. Pengawa ka ngirup tok endang sigi ari cara kitai begawai tang kitai tau ngubah ari segi atur ngirup ngambi ka lebih manah agi ka pengerai enggau penyamai diri empu.

Jako Lalau Lumur 7

Pulai Ka Baru Pengawa Lama

Aba penemu aku, kitai mesti nyambut gawai enggau chara asal kitai Iban begawai. Pengawa nebah merecun pukul 12 malam ukai cara kitai nanda ka gawai udah datai. Pengawa ka masang lagu dangdut serta berjoget, tau tang anang nyau nyak aja digaga kitai ngerami gawai. Uji baum manah, nama utai digaga aba siti-siti rumah panjai dikena ngerami gawai ngambi ka bisi dikenang. Tesau semua enggau begawai sama ngambi ka ulih ngerapat ka kaul enggau pangan diri.

Aku ukai ngemandai ka diri tang semina ngemansut ka penemu. Enti bisi salah aku minta ampun, enti bisi penemu ka manah tau diambi ngambi ka Gawai Taun 2023 tok mai reti ka besai ngagai kitai semua. Selamat Hari Gawai ari aku. Aku ngajih ka semua kitai  gayu guru gerai nyamai, lantang senang nguan menua. Ohh haaaa!

Jamah Lubah Amat Meh Datai, Pemujur Kitai Mensia Sigi Enda Sebaka, Asal Anang Putus Pengarap Ka Diri Empu Ketegal Alah Laban Penguji

 

Aku endang ari kelia sigi enda kala makit diri enggau sapa-sapa laban sigi nemu diri empu enda ulih bejalai kelalu jampat lalu belanda kelalu laju baka orang bukai. Pemujur orang aku ambi nyadi ka perangsang. Aku sigi nitih enggau gaya serta chara aku empu. Laban aku nemu nadai sapa-sapa orang ulih nyukung tauka nulung kitai mansang ka pengidup diri kelimpah ari kitai empu. Tang kitai mesti bisi juluk ati deka dijapai. Enti kitai nadai juluk ati, pemendar kitai gawa tauka kerja enda dipeda asil laban kitai nadai utai deka digagai. Taja mayuh orang madah orang tik mujur ia nyak sida ka pintar dalam perajar sekula. Nyak endang amat. Tang enti nuan enda mujur dalam perajar sekula ukai retinya nuan alu nadai peluang ngemansang ka diri. 

Semua orang sigi bisi peluang nyepi pengidup tik senang tauka menyana, asal kitai enda lembau berfikir baka ni deka ngemutar ka penguji tik nuntung diri empu. Kitai mesti cukup pengarap ka diri empu. Kebuah pia, orang ka nadai pengarap ka diri empu sigi tusah deka mujur laban pengeran ati ia enda tetap, sari tok baka tok, pagila tau nyadi lain laban runding ia selalu malik ngagai penanggur. Ari nyak semua kerja ia enda nyadi lalu ngujung ka nadai asil tauka penguntung. Siti agi penemu aku enti kitai deka mujur dalam pengidup ia nyak anang guai manjung sebedau datai ba pala wong. Diato mensia kelalu gagit berkongsi cerita pemujur diri empu aba media sosial, tauka ngelangkung diri enggau macam-macam leka jako. Ambil ka banding, baru aja dikangau ka orang temuduga, udah bisi jako gerah enda menuku dikungsi ka aba media sosial ngambi orang mayuh nemu. Pengawa ka baka tok tau lubah digaga, nurun aja dulu. Udah mujur bulih baru tau dikunsi enggau bala mayuh. Pia mega kitai ka baru muka kedai tau ka pengawa bukai. 

Tok semina penemu aku aja. Penemu tok nadai sangkut enggau sapa-sapa kelebih agi sida ka ngelala tauka damping pengidup enggau aku. Runding ka nulis penemu ka baka tok ngambi ka kitai sama-sama berunding ngemetul ka diri empu awak ka nyadi lebih manah agi ari ka udah. Pengidup kitai bepanggai aba atur kitai empu, baka ni kitai mai diri, baka ni kitai nyingkang ka kaki, baka ni kitai netapka juluk ati, sigi nentu ka pengidup kitai dudi ari. Jalai ditujah sigi enda sebaka, nalan digagai sigi enda sama. Kitai mesti selalu sedia enggau penguji ka datai laban sigi enda mudah nyadi orang ka mujur, penguji sigi mayuh, enti enda tan ati, kitai tau salah runding lalu nyurut ka diri.

PENEMU CIKGU ZUL (BAHASA IBAN) NEMU-NEMU MEH NUAN NYUKAT BAJU BA TUBUH NUAN EMPU

 

Perkara ka selalu nyadi aba pengidup kitai ka maya ari, kitai selalu idup ngelui ari pemisi diri empu. Kebuah pia kitai selalu makit diri enggau orang bukai. Kitai enggai alah lalu enggai ngalah ka diri. Nyema ka banding, enti kitai meda orang ka dipakit kitai nyak ngena meli kereta Honda CRV kitai pan meli kereta ka lebih mar agi ari engo ia. Tang kitai meli nadai tuju-tuju. Kitai meli semina enggai ka diri dipeda alah ari ia. Udah nyak buk nyau abis tusut begiga ka duit dikena bebayar ka utang tiap-tiap bulan. Orang ka dipakit nuan, kada nemu nuan makit ia deh. Penusah pulai ka nuan lalu ia idup meruan baka selama. Mensia ka nadai untung-untung ia nyak mensia ka makit orang ari belakang lalu orang ka dipakit ia enda ngelala ia tauka enda ibuh ka ia. Utai ka baka tok nyadi laban kitai nipis pengarap ka Tuhan datai ka kitai nyau rindu nitih ka runding tik salah, ia nyak runding ka ngenusah diri empu.

Bisi gak sekeda mensia, enda makit orang enggau pengeraja tang meri orang jako jai ketegal orang merinsa tauka beli ba mata ia. Ia ngasai ka diri udah cukup aba semua perkara lalu ia peneka ati nyembur orang enggau leka jako meda orang ka enda ngelaban tauka enda nimbal ia. Mensia ka baka tok suah dipeda bebali pengidup. Ia nemu pengidup tok baka tayar, bisi maya nuan ba atas lalu bisi maya nuan aba baruh tang ketegal kelalu sombong laban ka udah jauh ninggal ka orang, ia nyau enda ingat ka asal penatai diri empu. Semua kaban belayan ka dibaruh ia jai magang dipeda ia laban nyau enda sebanding agi enggau ia. Kaban belayan ka idup menyana ka ia meda tang ia enda nemu orang begulai enggau ia semina ngelakon diri aja. Udah ia labuh baru ia nemu ni langit tok tanah.

Kitai ulih idup enggau lantang enti kitai ngelala sapa diri kitai empu. Anang ngelui ari utai ka ulih kitai empu. Orang enda meda nama jenis kereta dikena nuan tang orang meda baka ni nuan ulih ngatur rumah tangga, bini, enggau anak nuan enggau manah. Semua mensia udah diatur Tuhan enggau manah jalai ngiga pengidup, adu ka diri enggau badas, anang menyati pengidup diri empu. Pengidup tik nyamai ia nyak pengidup tik serekun lalu cukup semua utai. Enti kitai enda ulih meli rumah dua tingkat, kitai meli rumah setingkat. Orang ka begulai enggau kitai ketegal pemanah enggau basa kitai ukai ketegal berapa tingkat rumah dibeli kitai. Enti orang datai ka rumah kitai, orang berati ka pemersi rumah kitai ukai meda berapa rega sofa tauka semua utai ka bisi aba rumah kitai. Enti kitai ulih nadai salah tang anang majak ka diri ulih enti ke bendar nuan enda ulih.

Tok semina penemu aku. Nadai sangkut paut enggau sapa-sapa. Penemu maya ngirup kopi. Enti salah aku minta ampun. Enti betul ambi ka lalau pengidup. Ngajar kitai ngajar aku meda laban kitai mensia sigi enda ulih kelalu manah nguan dunya. Penyilap sigi bisi, ari nyak kitai mesti ninga penemu ari orang bukai ngambi ka kitai ulih  meda penyalah diri empu lalu ngubah utai nyak nyadi betul.

PENEMU CIKGU ZUL (BAHASA IBAN) : KIRUH-KIRUH NGELABUH KA ORANG UJUNG-UJUNG NUAN EMPU KA PELIK-PELIK MATA

 

Aku bisi maca siti artikel senentang penemu tok. KFC enggau McDobald's sama-sama bedagang bejual ka manuk goreng, burger, enggau kentang goreng. Kitai enda kala ninga KFC bejai manuk goreng tik dijual McDonald's. McDonald's pun begitu, nadai kala didinga bejai pemakai ka dijual aba KFC. Taja pia, dua syarikat bejual pemakai tok majak maju lalu mayuh cawangan aba serata dunya. Orang sanggup baris berjam-jam laban ka meli manuk goreng aba dua iti kedai nya. Enti aba airport kitai selalu meda dua iti kedai tok enda jauh endur tang nadai kala kitai meda sida belaya berebut ka pelanggan. Ari utai tok kitai tau berajar ka siti penemu, kitai enda ibuh bejai orang bukai enti kitai deka mansang tauka niki lebih agi ari orang bukai dalam semua pengawa.

Ukai semina dalam pengawa dagang aja tang dalam pengidup kitai besari-sari, kitai anang sekali-sekali kiruh bejai orang dikena ngemadas ka diri empu. Kitai anang gagit betusi ka penyalah tauka penyilap orang ngagai orang bukai ngambil ka ia bulih pemalu tauka labuh datai ka enda ulih mansang ke mua agi. Kitai idup didunya tok semua udah bisi ungkup diberi Tuhan. Enti kitai manah ati bebasa ka orang  bukai, nyukung serta mantu sida ka beguna ka bantu kitai, pemujur dalam pengidup kitai deka jauh agi lebih manah. Kebuah pia laban Tuhan enda tinduk, ulah lalu pengawa kitai ka manah deka ditambah ka Tuhan belama baik ka kitai nemu tauka enda.

Ingat meh utai ka selalu nyadi dalam pengidup orang ka udu jai ati enggau orang bukai. Sida sigi ulih niki tang semua nyak enda lama laban sida deka labuh nadai disadang. Penyenang tik diulih kitai ketegal nelih ka ati orang bukai enda tan lama. Penatai pemisi ka diulih kitai ketegal kitai nutup periuk asi orang bukai tauka ngambi peluang sida enggau cara tik salah tusah ka betambah. Jalai pengidup kitai bepanggai aba kitai empu. Pilih meh jalai ka mai penguntung enggau pengelantang. Ati tik lurus enggau pengawa ka badas deka mai pemujur enggau penyenang dalam pengidup datai ka belama-lama ia.

CATATAN DALAM BAHASA IBAN : PENEMU CIKGU ZULKARNAIN : MIMPI KELALU TINGGI TANG NGELUSU NGIGA PEMANDAI

 

Kitai selalu temagah ati maya bercerita ka orang bisi pemandai. Kitai bejako ka pemintar enggau pemendar ia ngiga pemandai datai ka bulih pemujur dalam pengidup. Pemandai tok sigi mula ari penemu tik diulih kitai maya sekula. Ari nyak apai indai kitai bekeradai nyekol ka kitai ngambi ka kitai bulih pemandai. Sida enggau naka ulih nyukung kitai buji tudah udah nadai peluang laban ka udah jauh tinggal di belakang dalam pengawa begiga ka pemandai ketegal ka idup aba menua ulu. Aku selalu sinu enti ngingat ka niang apai enggau niang indai ka selalu miring ka jari, sandau ari lalu begawai ka aku maya nurun sekula munya. Nyak meh tanda apai indai kitai besai amat pengarap nganjung kitai ka sekula.

Aku nemu semua anakbiak nemu nama tuju sida ke sekula. Sida nemu nama penguntung orang ka bisi pemandai. Sida pan bisi juluk ati tik tinggi deka nyadi orang tik landik, bisi penemu, ngemuan pemintar lalu bulih pemandai. Tang meh, aku selalu meda bala anakbiak selalu alah enggau penguji maya besekula. Penguji tik balat ngasuh sida rarat datai ka nyau tebasau jam ngiga penemu ia nyak pengawa gila bepangan. Agi biak (umur 13 -17 taun) udah kiruh begiga ka sulu datai ka nyau belaki bebini maya agi biak. Pengawa ka kelalu berumban belaki bebini sebedau tulih ka pengidup tik menyana tok balat amat masau anak bansa kitai berebut ngulih ka nalan tauka peluang berajal ngagai tikas tinggi enggau bansa bukai tik udah jauh maju. Enti sida likun napi pengidup enggau penguji berumahtangga nyak manah tang ke mayuh agi udah 2 tauka 3 taun jadi udah bisi rita sarak maya udah bisi anak. Tok meh utai ka balat ngacau anak bansa kitai ngiga pemandai.

Pengidup tik kelalu rindu deka bemain enggau muai masa ngaga pengawa tik enda menuku pan siti ari penanggur kitai ngiga pemandai. Enti kitai meda, anak bansa kitai agi mit udah nemu enggau orang ngirup ai bisa, nginsap tauka bejudi. Maya bisi pengerami, hal ka baka tok nadai bisi orang ngerara tang dipuji bala mayuh enti sida ulih ngabis ka sebotol tauka semangkuk ai bisa (One go langgak) ko sida rumah panjai. Pengawa ka baka tok tau ngerusak untak anakbiak lalu ngujung ka sida nyau semun pengingin ati deka ngiga pemandai. Tang enti bisi orang ngerara tauka deka ngemetul la utai tok, mayuh gak bala apai indai ensiban ati. Sida enggai ninga penemu tik badas dikena ngemutar ka ulah anak sida. Penyiru ati ka anak tau ngasuh sida ngelaya orang ka badas ati deka nulung ngajar anak sida.

Anak ka udu ditanah ka nuan maya ngaga penyalah ketegal nuan nangi ka diri malu nyak meh ngenusah nuan dudi ari ila. Anak tik kelalu dikesayau ka nuan datai ka beambis duit enggau beambis ati bebeli ka mayuh macam utai berega nyak meh ka ngemai nuan umang dudi ari ila enti salah chara nuan ngajar ia. Jauh ka ngemai nuan senang, suah di peda ia nipu nuan lalu ngemula ka nuan datai ka nuan nyau nadai daya agi ngubah ulah enggau perangai ia. Tok meh utai ka tau sama-sama kitai peda enggau silik enggau lansik maya ka ngiga jalai tik lurus ngulih ka pemandai. Salah mimit chara kitai tau ngasuh jalai pengidup bala anak rusak datai ka belama ia. Jako tok ukai reti aku nemu-nemu ngemansut ka  penemu, tang sama-sama meh kitai berunding ngambi ka kitai ulih mansang ke mua nitih ka bansa bukai. Anang orang mansang kitai majak nyurut ka diri laban ka alah bulu ari orang ka jauh bisi pemandai ari kitai.

Ngiga pemandai enda tusah tang kitai mesti berani ngubah pengidup ka diato. Siti ari pengawa ka cukup badas dikemuan tik amat deka ngiga pemandai ia nyak pengawa rindu maca bup. Enti ari mit kitai mai bala anak likun maca dalam kandang sejam tauka dua jam sehari, lama-lama pengawa ka baka tok nyadi batang pengawa ka dikerindu maya lepa. Kelimpah ari nyak sukung ngagai anak tik besekula mesti cukup. Anak kitai nyak meh reta tik pemadu manah diberi Tuhan ngagai kitai. Ibun meh anak enggau manah. Maya ia ngaga ulah tik enda manah nuan ngajar ia enggau ulah tik betul ngambi ia nemu reti adat enggau basa. Anak tik cukup intu apai indai sigi senang ngiga pemandai.

PENEMU CIKGU ZUL : SURAT ARI APAI NUJU BALA ANAK, BESERAKUP NGEMAJUKA PENGIDUP, ANANG MAJAK SURUT KE BELAKANG

Tabi basa ari aba ngagai nuan anak,

BERAJAR MEH ENGGAU BEBENDAR DI SEKULA

Dunya maya ari tok anak, beguna ka pemandai enggau pemintar kitai ngulih ke penemu. Bansa maju endang sigi bansa ka bepenemu enggau bisi pengelandik dalam semua bidang. Uji peda kitai bansa Jepun, saiz tubuh enggau pendiau pengidup sida nadai jauh ari kitai Iban tang sida jauh amat ninggal ka kitai ari pengelandik enggau penemu. Ketegal tik ngemeran ka penemu sida ulih megai menua. Maya lepa sida maca bup laban sida nemu makin mayuh sida maca makin mayuh penemu ulih sida ngemaju ka bansa. Ari nyak anak, kita anang lembau datai ke sekula. Datai ke sekula enggau ati tik kering ka nyadi mensia ka pandai ukai datai ka sekula ketegal tuju bukai ka enda manah. Kitai mesti nemu merening pengidup diri empu. Kitai mesti meda pemerinsa diri empu. Kitai mesti nemu tuju apai indai nganjung kitai ka sekula. Anang meh kitai masau diri empu maya di sekula. Orang bukai berajar bebendar tang kitai enda. Pemandai ukai datai diri tik kitai enda pintar berusaha. Pengelandik enda datai diri tik kitai enda angkun ati serta sabar ngulih ka ia. Kitai mesti meda bansa bukai ka mayuh orang bisi pengelandik enggau pemandai. Nama pengawa sida di sekula? Uji perati ka ulah sida enggau silik.

Tang meh anak, lebuh maya ka meda ulah kita di sekula, ai mata nyau labuh beterutu dalam ati. Kita dipeda udu masau ari enggau pengawa ka enda manah. Kita datai ukai deka ngulih ka pemandai tang mai pemalu ngagai bangsa enggau apai indai. Kita baka ka nadai empedu malu laban kempang ati ngaga ulah ka enda manah di sekula. Pemuruk kita tampak amat dipeda mata. Utai ka diberi bala pengajar enda digaga kita enggau manah. Anti maya peresa, kita cuma nganjung kertas kosong nadai ditulis enggau saut ka ditanya. Anak bangsa bukai sampai jam cukup pan agi nulis tang kita nyau tinduk bekuruh sampai enda nemu dunya. Anti pengajar ngerara ulah kita, pengajar dilaban enggau jako jai. Kita enda nemu nama tuju pengajar ngerara lalu ngano ulah ka enda manah baka nyak. Sida enggai meda pengidup kita merinsa dudi ari. Tik nitih ka ati, kapa meh ka kiruh ka pengawa kit aka buruk serta ngelusu, ukai kita nyak anak sida, tang meh laban ka bisi ati sinu ka bansa diri empu, enggai enda tat ka aja ati tik pedih dilaban kita. Tik enggai diukum cikgu awak ka Petara meh ngukum kita.

Anak asi tik dikesayau,

ULAH KA MANAH MAI PEMANDAI

Ulah tik enda angkun ke perajar maya di sekola mesti ditikau jauh-jauh ari ati kita. Kita mesti nemu tuju kita dianjung berajar ketegal apai indai deka meda kita idup senang lantang dudi ari ila. Sida enggai meda kita idup bekuli baka sida ia. Pengidup bekuli anak, endang bisi gaji serta tulih ka pemakai kena ngidup ka anak bini jemah ari tang sampai bila bansa kitai enda ulih nyadi Tuan Besai baka bansa bukai. Kitai mesti bisi juluk ati ka tinggi, tik nyema maya jaman apai indai kitai, nadai meh salah sida bekuli laban maya sida suba, apai indai sida enda ngansak anak dalam perajar. Tang maya kitak, bansa kitai mesti berubah, kitai mesti nyingkang jauh ari pengidup tik udah diasai maya begulai enggau sida, enggai ka pengidup bansa kitai terus tinggal, enggai ka maruah bansa kitai terus diketawa ka orang, enggai ka bansa kitai terus diindik orang belama-lama. Nyema jako, anti diato kitai berutang aba orang, kitai mesti ka bisi juluk ati deka ngasuh orang nyak berutang bebeli ka barang apa kitai. Semua utai tok ukai mimpi, anti kitai bisi ati deka ngemaju ka diri start ari maya kitai ka sekula.

Lebuh maya sekola, anang kelalu ka ngaga ulah ka enda manah. Pengawa ka udu belaya serta enggai bepeda ka pangan diri anang sekali-kali laban utai ka baka nyak nadai mai pemanah ngagai pengidup. Pengawa ka bebakih, betulung, serta besukung ka pangan diri, nyak meh ulah ka manah maya kitai nyadi anakbiak sekola. Kitai mesti bebasa ka bala pengajar, apai indai serta kawan-kawan kitai ngambi ka pengidup kitai diberkat Petara Tik Bekuasa. Anti nyema kitai bisi bersengki ka penemu, anang meh ngemesai ka laya ka baka nyak sampai beinsah enggau bejamah. Semua utai tik enda betul, tetap ulih diputarka enggau runding serta penemu. Anang sampai ati ka ngemedis ka pangan diri laban kitai enda nemu nasib siko-siko dudi ari ila. Kadang-kadang kaban ka enggai dipeda kitai, ia meh ka nulung kitai maya tussah ke dudi ari. Ari nyak kitai mesti bisi ati manah enggau semua orang. Anang sekali-kali datai jari enggau kaki ngagai kawan-kawan kitai di sekula. Panjai ka runding sebedau ngereja pengawa ka salah. Kitai mensia endang diberi Petara untak kena berfikir. Guna meh untak kena berfikir ka perkara ka manah-manah, perkara ka ulih ngemaju ka diri serta bansa diri empu.

Anti sayau ka sekula endur ngiga penemu serta cikgu ka meri penemu, nadai kebuah kitai tau ngaga pengawa ka enda manah laban pengawa ka baka nyak tau mai pemalu ngagai semua pihak. Ketegal kitai siko ajak ka nyadi ‘antu’ nyadi ‘jelu’, orang bukai ka dirampit kitai. Pengawa ka baka tok amat enda adil enggau sida, laban kini-kini ka tuju pejalai kitai, nama sekula endur kitai berajar enggau kitai. Anti nama sekula kitai manah, pengidup kitai senang laban orang ka endur kitai minta pengawa mudah nerima kitai, tang anti nama sekula kitai jai didinga orang, taja pan pemutus periksa kitai manah, orang tetap enda perchaya ka kitai. Nyak meh bala cikgu enda ngasuh kitai ngaga ulah ka mayuh macam maya sekula. Semua nya ketegal sayau ka kita, ukai ketegal sayau ka sida.

Anak asi tik enda disagi,

ANANG GAGIT BEPANGAN MAYA SEKULA

Penanggur ka bangat ngacau kita sampai enda ingat ke perajar ketegal ati kelalu ka bepangan maya sekula. Kita datai ka sekula, ukai ka ngulih ka penemu tang ka ngulih ka laki tauka indu enggau bepangan. Kita bepangan sampai ngerusak pengidup diri empu. Ketegal sayau ka pangan kita sanggup ngaga mayuh macam ulah ka enda manah serta ngemalu diri empu, apai indai serta bala pengajar. Runding kita amat pandak anak, pengawa ka baka tok nadai mai penyenang ngagai pengidup kita ka dudi ari. Semua tok mina mai penusah. Ukai mimit bala anakbiak sekula ka ngaga ulah ka baka tok idup merinsa laban kelalu nitih ka ati, agi biak udah badu sekula, agi biak udah nyadi janda, agi biak udah beribun ka anak. Uji peda bansa bukai, maya agi biak maya nyak meh sida kiruh begiga ke penemu enggau pemandai dikena sida ‘ngemelik’ ka bansa kitai. Laban ka maya ari, orang idup beguna ka penemu kena ngiga duit. Tik kitai pandai ngulih ka duit tang nadai penemu ngena duit, pengidup kitai nadai meh tuju. Duit dipegai jari sejuta pan ulih abis dalam seari laban kitai senang dikemelik ka orang ka bisi penemu. Orang kaya kitai terus merinsa.

Orang indu tauka orang laki enda nemu abis di dunya tok. Maya sekula ukai maya bepangan. Umur agi panjai dikena kitai ka ngaga ulah ka baka nyak. Anang berfikir semua laki tauka indu nyau abis ‘mati’ pagila lusa. Maya umur agi biak, guna meh enggau begiga ka penemu serta pemandai sekula ngambi ka dudi ari kitai enda ngining pengidup orang. Kitai mesti nemu, orang ka pandai, orang ka kaya, orang ka bepangkat tinggi ukai ketegal Petara meri semua utai nyak ngagai sida. Sida naka ulih berusaha ngemaju ka diri empu sampai berjaya. Sida nadai beza ari kitai laban penatai sida sama meh ari Petara. Pengidup sida mungkin lebih tusah ari pengidup kitai tang siti ajak beza sida bisi juluk ati ka ngemaju ka diri baka orang bukai tang kitai bisi juluk ati ka ngenusah pengidup diri empu. Nama tuju kitai begaga ka ulah ka enda manah baka tok maya sekula? Nadai tuju ka ngengala. Kitai semina ka ngemedis serta menyati pengidup diri empu.

Jako Aba ka penudi,

SEMUA MENSIA MESTI BISI JULUK ATI TIK TINGGI

Juluk ati ka maju baka bansa bukai mesti bisi aba tiap-tiap iko kita anak. Orang ka nadai juluk ati nyak orang ka nadai tuju jalai pengidup. Kitai Iban, mayuh keresa, mayuh tanah, tebal enggau adat serta budi basa. Kita mesti bisi juluk ati ka ngemaju lalu mai semua keresa nyak nyadi ka penguntung ka bansa kitai empu. Kita mesti bisi juluk ati ka nyadi lawyer, lutor, jurutera, ahli saintis, serta mayuh agi pengawa ka menyana ngambi ka orang enda meda bansa kitai enggau sepiak mata ajak. Juluk ati ka tinggi endang manah laban kita teleba ngemanding ka pengidup kitai enggau pengidup orang bukai. Uji peda kitak Tony Fernandez, ia nyadi manager AirAsia laban la berani nangung pengawa ka bansa nyak. Pengidup ia ukai senang ari asal anti kitak maca cherita pengidup ia. Ia orang merinsa. Tang ia gigih berusaha enggau ngaga mayuh macam pengawa. Semua utai tau mai penyenang anti kitai bisi juluk ati deka ngemaju ka diri empu. Dalam pengawa bedagang, orang ka berjaya serta landik dalam pengawa dagang ukai nyak bisi pemandai tang sida berani laban bisi juluk ati ti tinggi.

Juluk ati ti tinggi deka maju tau mai pemujur, penyenang, enggau pengelantang ngagai pengidup kitai ka dudi ari. Anti nyema diato kitai diau di rumah panjai enggau apai indai, kitai mesti bisi juluk ati ka mai sida idup di negeri, meli ka sida rumah banglo, mai sida raun ngagai menua bukai serta meli mayuh macam utai dipinta sida. Ari nyak meh kitai tau nyadi anak ka manah serta menyana, idup kitai diberkat Petara belama-lama. Tang meh anak, anti kitai nadai penemu enggau pemandai, semua utai nyak enda ulih digaga kitai enggau sidak. Kitai akan ngenusah ka pengidup sida laban idup bepanggai enggau sida ari mit sampai ka tuai. Bansa kitai ukai bansa ka lemi, kitai lemi laban kitai enda ulih maju baka bansa bukai ketegal orang ka bepenemu, bisi pengelandik enggau pemandai amat mimit. Ari nyak kitai gagal bersaing enggau bansa bukai.

ANAK, INGAT KA JAKO ABA

Bansa bukai enda nulung kitai anti kitai enda serakup nulung bansa kitai empu. Tik bansa kitai terus tinggal dalam pemandai enggau perajar, bansa bukai akan ngambi kesempatan nguna kekurangan kitai nyak kena ngemaju ka bansa sida. Kitai enda ulih ngano orang anti orang ngaga kitai baka nyak laban kitai nadai daya kena ngelaban sida. Dunya diato, kitai enda ulih ngelaban orang enggau pengering bejamah, pemintar belaya, serta penguat kitai ngirup ai bisa, semua utai tok ngasuh bansa kitai rusak serta diketawa ka orang belama. Pengawa ka enggai bepeda ka pangan diri ka agi tebal dalam bansa kitai mesti dibuai abis ari ati kitai lalu tukar enggau pengawa ka beserakup serta nyukung bala ka udah maju serta bisi potensi mai penyenang ngagai bansa kitai. Kitai Iban nadai dua tiga bansa, kitai semina siti bansa ajak, taja penatai kitai enda sama endur, kitai tetap sama bansa. Ari nyak kitai enda tau enggai bepeda ka pangan diri. Pengawa ka enda manah baka tok ukai ngasuh kitai maju tang ngasuh kitai tusah begiga ka penyenang enggau pengidup. Maya besekula, besekula meh enggau naka ulih ngambi tulih ka pemandai kena ngemaju ka diri empu dudi ari ila. Maya bekerja, bekerja meh enggau naka pengerajin ngambi mudah gerah ngulih ka penyenang enggau pengeraja. Maya megai pengawa, pegai meh pengawa enggau manah ngambi ka ulih nulung ngemaju ka bansa. Tik kitai beserakup, nadai utai enda ulih digaga kitai tang anti kitai bepecah belah, sampai kiamat dunya tok kitai alu enda maju-maju, pengidup kitai diatur orang, pemakai kitai diberi orang, lalu kitai bekerja bekuli aba orang. Kasih kitai anak. Kasih kitai. Kasih meh ka aba nuan ka udah tuai tok.

Peransang ari,

Cikgu Zulkarnain Farihin

Anak Iban Katibas Song

Remaung Katibas. 

CATATAN CIKGU ZUL : PAKAIAN ITU IDENTITI KAMI, TOLONG HORMATI!

Sewaktu menonton sebuah rancangan hiburan yang berkonsepkan lawak pada hujung minggu lalu, semangat untuk ketawa tiba-tiba hilang sebaik sahaja sebuah kumpulan lawak mempersembahkan suatu persembahan yang mengunakan pakaian tradisional salah satu suku kaum di Sarawak iaitu suku kaum Iban. Sebagai seorang warga yang berbangsa Iban, saya memang tahu ramai yang tersinggung menyaksikan persembahan tersebut kerana pemakaian pakaian tradisional itu adalah salah. Pada pandangan saya, walaupun konsep rancangan itu lebih kepada lawak, mereka harus peka dengan beberapa perkara yang berkaitan dengan sensitiviti sesuatu suku kaum. Hidup dalam masyarakat majmuk di Malaysia yang indah dan permai ini memerlukan kebijaksanaan kita menggunakan akal fikiran sebelum melakukan sesuatu terutama dalam beberapa perkara yang berkaitan dengan kebudayaan dan adat istiadat sesuatu suku kaum.

Jangkaan saya memang betul. Keesokkan harinya saya melihat ruangan Facebook penuh dengan komen peminat rancangan tersebut. Ramai yang melontarkan kekesalan tetapi ada pula yang menyanggah. Semuanya tampak gagah dengan pendirian masing-masing. Dalam dunia muka buku ini semua orang mampu berjuang dengan memberikan komen masing-masing terhadap sesuatu isu. Saya membaca pandangan pelbagai pihak. Yang berfikiran matang, komen yang dilontarkan pun tampak matang. Yang kebudak-budakkan, komen yang dilontarkan pun tampak kebudak-budakkan. Yang marah pula mengeluarkan komen yang memang boleh menusuk hingga ke ulu hati. Contohnya, mereka cuma meninggalkan kata “Sila meninggal”. Pada hari itu, lambakan post yang berkaitan dengan isu itu menyerang laman Facebook terutama dalam kalangan penduduk negeri Sarawak suku kaum Iban.

Inikan rancangan lawak

Mengapa mereka tersinggung? Bukankah itu hanya rancangan lawak? Dalam rancangan lawak orang boleh buat apa-apa sahaja. Hakikat ini tidak dapat kita nafikan. Akan tetapi, dalam suku kaum Iban di Sarawak, tradisi itu amat penting. Pakaian perempuan mesti dipakai oleh anak perempuan. Pakaian lelaki mesti dipakai oleh anak lelaki. Cara pemakaiannya mesti betul. Jika salah, si pemakai akan dimarah. Dalam pertandingan Kumang Gawai atau Keling Gawai yang diadakan setiap kali habis musim menuai, paras rupa tidak penting jika pemakaian si ratu jelas kurang atau pincang. Kemenangan akan memihak kepada mereka yang lengkap dan tepat pemakaiannya. Bagi masyarakat Iban, pakaian itu merupakan maruah dan identiti masyarakat mereka. Oleh itu, pakaian tersebut tidak boleh dipakai pada masa yang tidak sesuai apatah lagi jika cara pemakaiannya adalah salah. Mereka memang terasa hati. 

Adakah mereka ini terlalu sensitif? Sebenarnya, masyarakat Iban bukanlah masyarakat yang terlalu sensitif dan tidak berfikiran terbuka. Saya sendiri misalnya tidak pernah terasa hati atau melenting tidak tentu pasal jika dikritik atau diberikan penilaian yang negatif terhadap kualiti kerja yang saya buat. Namun begitu, bagi hal-hal yang bersangkutan dengan budaya turun-temurun, saya memang marah jika dibuat seperti barang mainan. Hal ini dikatakan demikian kerana dalam kalangan masyarakat Iban yang masih tebal dengan tradisi perkara tersebut boleh mendatangkan bala atau malapetaka. Orang yang mempersendakan budayanya sendiri merupakan orang yang berdosa. Apatah lagi jika orang yang melakukannya merupakan kaum lain yang tidak pernah mengkaji dan mendampingi masyarakat kami. Pakaian tradisional suku kaum Iban memang dijaga dan dipelihara dengan amat baik. Jangan terkejut kalau harganya mencecah ribuan ringgit, akan tetapi mereka tetap akan membeli juga kerana bukan sebarangan orang boleh memiliki kemahiran menghasilkan pakaian tradisional suku kaum Iban. Walaupun saya sudah menganut agama Islam, saya tetap berusaha menyimpan sepasang pakaian lelaki dan sepasang pakaian perempuan kerana bagi saya itulah identiti yang mesti dijaga dan dipelihara. Saya tidak boleh melupakan identiti sebenar diri saya. Oleh sebab itu, apabila mata kita melihat, walaupun kita rasa pelik dan tidak berkenan, berfikiran positiflah kerana itu identiti sesuatu suku kaum. Perkara sebegini tidak boleh dijadikan bahan lawak!

Orang sensitif susah hendak maju?

Kenyataan ini merupakan tuduhan yang tidak digandingkan dengan akal yang waras. Sensitif terhadap budaya kaum sendiri tidak berkaitan langsung dengan kemunduran atau kemiskinan sesuatu kaum. Masyarakat Jepun yang jauh maju meninggalkan kita di hadapan pun masih tebal dengan tradisi mereka. Tradisi mereka sentiasa dijaga dengan penuh rasa patriotisme sehingga dikagumi oleh seluruh masyarakat dunia. Masyarakat Korea juga begitu. Apakah orang yang mempersendakan budaya kaum lain itu orang yang maju? Kita semua masih berada di level yang sama. Oleh itu, sebelum kita menggunakan apa-apa alatan atau pakaian tradisi sesuatu kaum, kita mesti bertanya kepada orang yang benar-benar arif tentang suku kaum itu. Kadang-kadang apabila kita bertanya kepada masyarakat Iban yang tinggal di bandar, mereka pun tidak mengenali cara pemakaian yang betul bagi pakaian tersebut kerana mereka sudah lama tidak tinggal di rumah panjang. Walau bagaimanapun, saya berani mengatakan orang Iban kini berada di segenap empat penjuru Malaysia bumi bertuah ini. Mereka berada di Central Market, Pasar Chow Kit, Pavilion, KLCC, KLIA, Langkawi, dan semua tempat di Malaysia. Tidak sudah mencari mereka untuk bertanya. Tidak salah mengkaji dan bertanya untuk mengelakkan diri daripada tersesat jalan. Insyallah, mereka akan memberitahu yang betul kepada kita. 

Kenapa perlu berlawak dengan cara merupakan diri sebagai seorang perempuan wahal kita lelaki yang sempurna? Mengapa perlu berlawak dengan mengutuk rakan seperjuangan terutama yang berbadan besar? Mengapa perlu berlawak dengan membodohkan diri kita sendiri. Mr. Bean menakluki dunia dengan lawaknya tanpa perlu berbuat begitu. Dia hanya menggunakan blazer yang sama warna dari awal hingga ke tamat cerita. Orang yang menonton ceritanya tidak henti-henti ketawa. Harith Iskandar dinobatkan sebagai Orang Yang Paling Lawak di dunia tidak perlu membonekakan dirinya. Undiannya tinggi sehingga menjadi juara. Mengapakah kita tidak boleh berlawak seperti mereka? Mengapakah kita tidak berusaha untuk menjadi seperti mereka.

Kami bantu mempromosikan

Pakaian tradisional kaum Iban hanya untuk kaum Iban. Pakaian tradisional ini hanya dipasarkan untuk kaum tersebut sahaja. Niat untuk mempromosikan itu tidak kena caranya. Biarlah mereka sendiri mempromosikannya kerana mereka lebih tahu cara penggunaan dan pemakaiannya. Banyak lagi perkara-perkara lain yang boleh dijadikan modal untuk membuat lawak. Kadang-kadang apabila kita melihat pengemis berjalan dengan pakaiannya yang koyak, badan berbau, tidak pernah mandi, dan kelihatan begitu hina pada pandangan mata, kita tidak boleh beranggapan mereka tidak kenal asal usul mereka. Mereka masih kenal identiti dan tradisi mereka. Mereka masih mampu bertutur dalam bahasa mereka. Mereka masih bernafas dengan menghirup udara sama seperti kita. Pepatah Melayu mengatakan, ‘tak kenal maka tak cinta’, kita harus mengenali secara mendalam sesuatu perkara sebelum kita menjadikannya sebagai tajuk projek, tugasan mahupun bahan lawak kita! Jika tidak kita akan mengundang kontroversi dan rasa tidak puas hati. Polemik ini akan terus berpanjangan jika tidak dipadamkan dengan ungkapan maaf yang penuh ikhlas. Ingatlah, kalau takut dilambung ombak jangan berumah di tepi pantai. Sesungguhnya, semua orang tidak pernah terlepas daripada melakukan kesilapan tetapi kesilapan itu akan mematangkan kita untuk terus mara ke hadapan.

Walau bagaimanapun, isu ini bukanlah isu besar untuk dibawa sehingga ke muka pengadilan. Banyak lagi isu masyarakat Iban yang perlu diperjuangkan terutama isu yang berkaitan dengan kesedaran tentang pentingnya pendidikan. Pendidikan harus dijadikan agenda utama untuk membangunkan kaum Iban agar standing dengan kaum-kaum lain di Malaysia. Insyallah. Moga-moga perkara sebegini tidak akan berulang lagi pada masa-masa mendatang seiring dengan kemajuan negara kita yang kian menghampiri ambang 2020.

TAHUN 2021 - KONTROVERSI TERCETUS LAGI OLEH INFLUENCER 'DURIANKIMCHI'

Tatkala negara masih bertarung dengan Covid-19, golongan yang menjadikan media sosial sebagai salah satu cara untuk meraih populariti dan menjana pendapatan ghairah menghasilkan video untuk meraih "LIKE", "KOMEN" dan "SUBSCRIBE" sehingga tidak dapat memikirkan baik dan buruk perkara yang mereka ketengahkan. Susulan itu, muncullah gurauan suami isteri sehingga menyamakan pakaian trasisi Iban dengan alas meja dan sebagainya. Hati siapakah yang tidak terluka? Saya beli almari berharga RM2000.00 hanya untuk menyimpan pakaian tradisional Iban yang saya beli dengan harga melebihi RM10,000 jika dikira satu persatu. Dia pula dengan nada bergurau menyamakan pakaian yang dipakaikan kepada isterinya itu dengan alas meja! Sepatutnya, sebagai manusia berpendidikan dia gunakan kesempatan itu untuk menarik perhatian suku kaum Iban supaya lebih ramai tertarik dengan DurianKimchi dan menjadi pengikut dia. Kenapakah dia tidak memuji isterinya cantik, anggun dan kelihatan lain selepas memakai pakaian itu? Jawapannya, orang macam dia bukan seorang tetapi ramai lagi. Golongan ini memang suka membenci dan mencaci suku kaum Iban sebab mentaliti sebegitu sudah tersemai sejak kecil. Itu bukan gurauan kerana dia tahu itu adalah salah selepas kali pertama mengujarkan, dia minta maaf tetapi selepas berlarutan beberapa jam baru memohon maaf maka kita faham itulah tujuan sebenar golongan sebegini yang sebenarnya ingin menagih perhatian.

Bagi saya, orang berpendidikan ini tahu baik buruk perkara yang diperkatakan dalam masa beberapa saat selepas mengujarkan kata-kata itu. Jika dia tidak sedar atau sedar selepas kemarahan meledak maknanya itulah sesuatu yang sengaja dilakukan. Saya mohon, berhentilah daripada mempersenda, mentertawa dan mempermainkan bangsa kami. Kami sangat menghormati bangsa-bangsa lain di Malaysia. Berkawanlah dengan kami maka awak akan tahu mulianya hati dan murninya jiwa kami. Jangan menanamkan kebencian dalam generasi anda terus menerus kerana itu hanya akan membawa banyak kesan negatif. Soal perkauman bukan mainan. Jika mahu bermain, pilihlah permainan yang betul untuk dimainkan. 

Catatan Seorang Pendidik Bangsa

Cikgu Zulkarnain Farihin

SMK Sibu Jaya

Sibu Sarawak