PENEMU CIKGU ZUL : 7 PENEMU ARI AKU DIKENA NYAMBUT GAWAI DAYAK

Sari tok kena 26 ari bulan lima 2023. Enti kelia, maya tok meh kitai Iban enggau bansa Dayak ka bukai udah berancau puang aba rumah panjai. Aku agi ingat, ati cukup pengaga maya deka nyambut ari gawai. Sekayu-kayu rumah panjai kiruh nyedia ka diri begiga ka lauk, meresi ruang bilik, begaga ka kuih enggau mayuh macam pengawa. Maya nyak suba orang ka bejalai begiga ka duit aba menua jauh semua pulai, cukup gaga meda sida berangkut ka utai dibeli. Diato gawai nyau lain, sida ka biak nebah lagu datai ka nyau tuli pending ninga, bejoget ari siang datai ka malam, ngirup ai bisa. Nadai agi pengawa ngabas ai baka suba. Jauh amat berubah. Taja pia, ngambi ka kitai meruan likun nyambut gawai, aku deka meri 7 jako lalau ngagai bala ka selalu macha penemu aku.

Jako Lalau Lumur 1

Bejimat Aba Jalai Alun

Nyawa kitai mensia semina siti aja. Ari nyak jaga meh enggau manah-manah. Maya deriba kereta anang kelalu laju enggai ka bebadi aba jalai alun, kelebih agi enti orang ka enggau kitai nepan kereta bala anak enggau bini serta apai indai kitai empu. Bejimat meh deriba. Anang kelalu ka berumban datai ka rumah panjai tauka endur ka dituju. Jako ajar sida ka tuai, "jamah lubah amat meh datai". Enti pala bisi sebening ketegal ka ngirup ai tuak segelas dua, tau anang deriba, enggai ka ngenatai ka penusah ngagai diri empu. Anang kelalu nitih ka pengingin ati. Sayau ka diri empu serta sayau ka orang ka nganti penatai kitai di rumah. Awak ka sida nyambut penatai kitai enggau pengaga ukai nyambut penatai kitai enggau sabak serta air mata.

Jako Lalau Lumur 2

Anang Kelalu Rua Bebeli Ka Utai

Pengudah COVID-19, dunya nyau majak berubah, ekonomi nyau majak enda manah. Rega barang nyau majak niki. Pagila lusa kitai enda nemu rega utai dipakai. Diato rega telo aja udah manggai aba RM18.00 sepapan. Ari nyak, ubah cara kitai bebeli ka utai. Ati tik ka meli enda alah tunda tang kitai mesti bejaga-jaga serta selalu meda pemisi diri empu. Kitai enda ulih agi kelalu mayuh bebeli ka ai bisa taja pan kitai bisi duit tauka kerja ka menyana. Pia mega enggau utai dempa, baka begaga tauka bebeli ka kuih. Aku tok bejako enda ngasuh kita semua sumit tang sebedau bebeli ka barang di kena begawai, tilik enggau badas-badas pemisi diri empu. Kitai enda tau nunda tauka bepakit enggau orang bebeli ka barang. Penemu ka enda manah baka nyak tau ngenatai ka penusah ngagai kitai empu dudi ari ila.

Jako Lalau Lumur 3

Anang Ngerua Utai Dempa (Pemakai)

Aku arap nadai agi orang nyau betuku tauka betampik pangan diri enggau asi pulut, kasam, tauka jukut. Arapka nadai agi orang ngasuh orang bukai majak pemajak makai datai ka nyau mutah ketegal kelalu kenyang. Pia mega nadai agi orang bepantil ngirup sampai ai tuak nyau abis naya. Begagai enda salah tang anang sekali-kali ngayah ka utai dempa. Taja kitai bisi duit meli utai dempa ka mayuh, anang sekali-kali utai nyak nyau dikena betuku tauka nyau basi enda alah empa, ngujung ka dibuai pia aja. Sayau utai dempa digaga baka nyak. Enti dibeli, diempa abis enggau manah nadai hal. Anang diayah tauka dibuai.

Jako Lalau Lumur 4

Berami Badas Maya Gawai

Ari gawai meh ari enggau kitai betemu serta begulai enggau apai indai, bala menyadi, bala kaban, bala kitai serumah serta bala ka sama nyambut hari gawai. Maya tok meh kitai minta ampun ngagai orang enti bisi salah runding tauka salah penemu enggau pangan diri. Titih ka jako ajar Tuai Rumah. Maya ka mabuk terus tinduk, anang kucah-kucah nyebut utai enda menuku datai ka nyau ngasuh ati orang enda nyamai. Anang sekali-kali kitai belaya maya gawai laban hal ka baka tok ukai tuju kitai nyambut hari gawai. Enti nyema bisi salah runding tauka salah penemu, atur enggau manah. Penemu tik saru ulih diputar enggau runding tik badas.

Jako Lalau Lumur 5

Jimat-Jimat Maya Mansut Ka Penemu

Kitai ka datai ari menua jauh, ka bisi kerja menyana, serta bisi pemandai selalu dibasa bala ka diau mendam ba rumah panjai. Tang  kitai mesti nemu mai diri, anang kelalu balat mansut ka penemu tang ngemaruh ka sida laban sida andal amai ka kitai tau ulih ngiring sida enggau penemu ka badas. Anang meh sombong enggau bala ka begulai enggau kitai maya mit suba, taja pengidup jauh berubah, kitai mesti ingat belama asal penatai kitai. Maya mit suba sama-sama main rumah aba karangan, nyemerai berebut ka buah ensurai, ngeransar aba tanah lucak, mandi telanjai enggau mayuh agi ulah anakbiak rumah panjai. Enti kita meda utai enda manah tauka enda betul, padah enggau jako ka alus ngambi sida ulih ngubah diri empu.

Jako Lalau Lumur 6

Ngirup Ai Bisa Enggau Ai Tuak Enda Sama

Ai bisa tauka arak enda tau diirup kelalu mayuh laban tau ngacau pengerai kitai. Kitai tau ngirup tang anang kelalu balat, enggai ka mai penusah. Penyakit enda datai maya kitai ngirup, penyakit ketegai ngirup tok datai maya umur kitai nyau udah tuai. Enti ai tuak, angka manah laban digaga kitai empu serta beresi. Tang aba runding aku, tagang meh nyawa diri. Anang nyau melampin aja bersari-sari datai ka bala apai indai enggau bala menyadi ka gauk ka kitai pan enda ulih. Pengawa ka ngirup tok endang sigi ari cara kitai begawai tang kitai tau ngubah ari segi atur ngirup ngambi ka lebih manah agi ka pengerai enggau penyamai diri empu.

Jako Lalau Lumur 7

Pulai Ka Baru Pengawa Lama

Aba penemu aku, kitai mesti nyambut gawai enggau chara asal kitai Iban begawai. Pengawa nebah merecun pukul 12 malam ukai cara kitai nanda ka gawai udah datai. Pengawa ka masang lagu dangdut serta berjoget, tau tang anang nyau nyak aja digaga kitai ngerami gawai. Uji baum manah, nama utai digaga aba siti-siti rumah panjai dikena ngerami gawai ngambi ka bisi dikenang. Tesau semua enggau begawai sama ngambi ka ulih ngerapat ka kaul enggau pangan diri.

Aku ukai ngemandai ka diri tang semina ngemansut ka penemu. Enti bisi salah aku minta ampun, enti bisi penemu ka manah tau diambi ngambi ka Gawai Taun 2023 tok mai reti ka besai ngagai kitai semua. Selamat Hari Gawai ari aku. Aku ngajih ka semua kitai  gayu guru gerai nyamai, lantang senang nguan menua. Ohh haaaa!