Pengawa Dagang Cara Senang Ngulih Ka Penyenang Enggau Penyamai Pengidup

Aku berasai temegah ati meda bala anakbiak bansa Iban ka rebak baru nemu muka jalai pengidup enggau pengawa ka bedagang. Taja pan sida agi baru dalam pengawa ka baka tok tang aku nemu sida udah bisi runding ka manah ngambi ka ulih duduk sama baruh serta berdiri sama tinggi enggau bansa bukai. Taja pan enda ngelala sida tang dalam ati selalu besampi ngambil Tuhan ngemujur ka pengawa sida serta nambah ka untung sida dalam pengawa dagang. Aba penemu aku pengawa bedagang tok meh pengawa ka pemadu muntang dikena kitai ngiga pengidup. Ambi ka banding, bala sida ka bejual lauk aba Pasar Tamu, nyak meh pengawa ka cukup badas ari ka diau diri aba rumah panjai. Dunya diato nyau berubah, duit pan majak berega, ari nyak kitai Iban anang betuan ka bansa bukai belama-lama dalam pengidup. Diato angka kitai agi jauh di baruh tang aku percaya dalam 10 taun tauka 20 taun tik ka datai angka bisi supermarket Iban ba menua pelilih Kapit enggau Song tauka aba menua bukai.

Mesti Nemu Ngadu Ka Untung

Pengawa bedagang tok senang ngulih ka duit tang enti kitai pandak runding, untung berpuluh-puluh ribu tau nadai dipeda dalam kandang dua bulan. Kebuah pia, laban kitai mudah amo mata lalu ka beguai dipeda orang lawa-lawa. Aku minta ampun meh angka jako aku tok salah. Kitai ka bedagang anang kelalu alah enggau pengingin ati ngayah ka duit. Untung bedagang simpan belama datai ka kitai bisi mayuh cawangan. Sekandang ka lima taun bedagang, duit ka ulih kitai nyak ukai untung, duitnya modal tauka simpanan kena kitai ngering diri laban kitai enda nemu penusah datai nadai semaya. Ari nyak baka ni penguji datai, kitai tetap puh bedagang laban kitai bisi sedia ari mula-mula kitai bedagang. 

Mesti Nemu Nambat Ati Orang

Kitai ka bedagang bekaban enggau semua mensia. Ulah mensia sigi mayuh macam. Bisi ka datai ke kedai kitai semina meda-meda barang. Bisi sekeda datai enggau ulah ka enda manah. Tang anggap meh semua ulah mensia ka baka nyak penguji ati kitai. Anang nuan ngambi video lalu viral ka orang enggau jako tik enda manah serta renjan. Taja ati nuan pedih tat ka aja meh laban orang ka datai ba kedai nuan nyak enti sida meda nuan ngelalu ka sida enggau manah serta badas, pagila lusa maya ia bisi duit ia datai agi ke kedai nuan tauka ia akan madah ka orang bukai pemanah nuan. Nuan enda nemu ia nulung nuan ari belakang. Pemanah ulah enggau basa kitai tau ngelemi ka ati orang ka datai. 

Kualiti Barang Dijual Mesti Dijaga

Bala ka bejual ka pemakai mesti bisi pengelandik nyediaka pemakai 2 kali ganda lebih manah ari kedai bansa bukai. Kebuah pia, kitai tok baru dalam pengawa tok, ari nyak kitai mesti bisi penemu tik baru dikena narit ati orang ke kedai kitai. Ambi ka banding, enti nuan bisi menu Nasi Goreng Dabai, enti kedai bukai ngena 3 igi dabai, nuan tau ngena 6 igi serta tambahka enggau daging tauka udang. Rega orang nadai entu bekira enti pemakai nuan nyamai serta beresi. 

Anang Udu Meri Orang Free

Kitai bedagang tok enggau modal tik besai. Semua utai dijual kitai mesti bisi pulai ka penguntung. Ari nyak, menyadi kitai empu datai ke kedai pan bebayar. Kitai empu pan pia, enti bejual ka pemakai, anang nyau separuh utai ka dijual masuk perut kitai empu. Enti baka nyak baka ni ka tulih ka penguntung. Bala bakih tauka kaban datai ka kedai kitai anang nyau semua enda asuh bebayar. Sida patut nyukung bisnes nuan ngambi ka terus mujur datai belama ia. Ati anang kelalu siru serta mulut anang kelalu gerah nyebut "enda ibuh bayar, nadai ngawa". 

Penemu aku tok semina datai ari runding aku empu. Aku ukai orang bedagang, aku pengajar. Aku semina rindu ngemansut ka penemu ngambi ka bisi nambah ka penemu bukai ka bisi didinga tauka dibaca kitak. Aku arapka semua bansa kitai ka bedagang tau mujur dalam pengawa ngambi ka jemah ila bisi jutawan bansa Iban masuk aba list mensia ka pemadu kaya ba Sarawak, Malaysia, tauka Dunya! Ni nemu, nasib manuk aba taji enggau pengelandik ia bebintih, nasib mensia kitai enda nemu, laban pemintar enggau runding siko-siko nentu ka pemujur ia dalam semua pengawa.