07 Mei 2017

PENEMU CIKGU ZUL : SURAT ARI APAI NUJU BALA ANAK, BESERAKUP NGEMAJUKA PENGIDUP, ANANG MAJAK SURUT KE BELAKANG


Tabi basa ari aba ngagai nuan anak,
BERAJAR MEH ENGGAU BEBENDAR DI SEKULA

Dunya maya ari tok anak, beguna ka pemandai enggau pemintar kitai ngulih ke penemu. Bansa maju endang sigi bansa ka bepenemu enggau bisi pengelandik dalam semua bidang. Uji peda kitai bansa Jepun, saiz tubuh enggau pendiau pengidup sida nadai jauh ari kitai Iban tang sida jauh amat ninggal ka kitai ari pengelandik enggau penemu. Ketegal tik ngemeran ka penemu sida ulih megai menua. Maya lepa sida maca bup laban sida nemu makin mayuh sida maca makin mayuh penemu ulih sida ngemaju ka bansa. Ari nyak anak, kita anang lembau datai ke sekula. Datai ke sekula enggau ati tik kering ka nyadi mensia ka pandai ukai datai ka sekula ketegal tuju bukai ka enda manah. Kitai mesti nemu merening pengidup diri empu. Kitai mesti meda pemerinsa diri empu. Kitai mesti nemu tuju apai indai nganjung kitai ka sekula. Anang meh kitai masau diri empu maya di sekula. Orang bukai berajar bebendar tang kitai enda. Pemandai ukai datai diri tik kitai enda pintar berusaha. Pengelandik enda datai diri tik kitai enda angkun ati serta sabar ngulih ka ia. Kitai mesti meda bansa bukai ka mayuh orang bisi pengelandik enggau pemandai. Nama pengawa sida di sekula? Uji perati ka ulah sida enggau silik.

Tang meh anak, lebuh maya ka meda ulah kita di sekula, ai mata nyau labuh beterutu dalam ati. Kita dipeda udu masau ari enggau pengawa ka enda manah. Kita datai ukai deka ngulih ka pemandai tang mai pemalu ngagai bangsa enggau apai indai. Kita baka ka nadai empedu malu laban kempang ati ngaga ulah ka enda manah di sekula. Pemuruk kita tampak amat dipeda mata. Utai ka diberi bala pengajar enda digaga kita enggau manah. Anti maya peresa, kita cuma nganjung kertas kosong nadai ditulis enggau saut ka ditanya. Anak bangsa bukai sampai jam cukup pan agi nulis tang kita nyau tinduk bekuruh sampai enda nemu dunya. Anti pengajar ngerara ulah kita, pengajar dilaban enggau jako jai. Kita enda nemu nama tuju pengajar ngerara lalu ngano ulah ka enda manah baka nyak. Sida enggai meda pengidup kita merinsa dudi ari. Tik nitih ka ati, kapa meh ka kiruh ka pengawa kit aka buruk serta ngelusu, ukai kita nyak anak sida, tang meh laban ka bisi ati sinu ka bansa diri empu, enggai enda tat ka aja ati tik pedih dilaban kita. Tik enggai diukum cikgu awak ka Petara meh ngukum kita.

Anak asi tik dikesayau,
ULAH KA MANAH MAI PEMANDAI

Ulah tik enda angkun ke perajar maya di sekola mesti ditikau jauh-jauh ari ati kita. Kita mesti nemu tuju kita dianjung berajar ketegal apai indai deka meda kita idup senang lantang dudi ari ila. Sida enggai meda kita idup bekuli baka sida ia. Pengidup bekuli anak, endang bisi gaji serta tulih ka pemakai kena ngidup ka anak bini jemah ari tang sampai bila bansa kitai enda ulih nyadi Tuan Besai baka bansa bukai. Kitai mesti bisi juluk ati ka tinggi, tik nyema maya jaman apai indai kitai, nadai meh salah sida bekuli laban maya sida suba, apai indai sida enda ngansak anak dalam perajar. Tang maya kitak, bansa kitai mesti berubah, kitai mesti nyingkang jauh ari pengidup tik udah diasai maya begulai enggau sida, enggai ka pengidup bansa kitai terus tinggal, enggai ka maruah bansa kitai terus diketawa ka orang, enggai ka bansa kitai terus diindik orang belama-lama. Nyema jako, anti diato kitai berutang aba orang, kitai mesti ka bisi juluk ati deka ngasuh orang nyak berutang bebeli ka barang apa kitai. Semua utai tok ukai mimpi, anti kitai bisi ati deka ngemaju ka diri start ari maya kitai ka sekula.

Lebuh maya sekola, anang kelalu ka ngaga ulah ka enda manah. Pengawa ka udu belaya serta enggai bepeda ka pangan diri anang sekali-kali laban utai ka baka nyak nadai mai pemanah ngagai pengidup. Pengawa ka bebakih, betulung, serta besukung ka pangan diri, nyak meh ulah ka manah maya kitai nyadi anakbiak sekola. Kitai mesti bebasa ka bala pengajar, apai indai serta kawan-kawan kitai ngambi ka pengidup kitai diberkat Petara Tik Bekuasa. Anti nyema kitai bisi bersengki ka penemu, anang meh ngemesai ka laya ka baka nyak sampai beinsah enggau bejamah. Semua utai tik enda betul, tetap ulih diputarka enggau runding serta penemu. Anang sampai ati ka ngemedis ka pangan diri laban kitai enda nemu nasib siko-siko dudi ari ila. Kadang-kadang kaban ka enggai dipeda kitai, ia meh ka nulung kitai maya tussah ke dudi ari. Ari nyak kitai mesti bisi ati manah enggau semua orang. Anang sekali-kali datai jari enggau kaki ngagai kawan-kawan kitai di sekula. Panjai ka runding sebedau ngereja pengawa ka salah. Kitai mensia endang diberi Petara untak kena berfikir. Guna meh untak kena berfikir ka perkara ka manah-manah, perkara ka ulih ngemaju ka diri serta bansa diri empu.

Anti sayau ka sekula endur ngiga penemu serta cikgu ka meri penemu, nadai kebuah kitai tau ngaga pengawa ka enda manah laban pengawa ka baka nyak tau mai pemalu ngagai semua pihak. Ketegal kitai siko ajak ka nyadi ‘antu’ nyadi ‘jelu’, orang bukai ka dirampit kitai. Pengawa ka baka tok amat enda adil enggau sida, laban kini-kini ka tuju pejalai kitai, nama sekula endur kitai berajar enggau kitai. Anti nama sekula kitai manah, pengidup kitai senang laban orang ka endur kitai minta pengawa mudah nerima kitai, tang anti nama sekula kitai jai didinga orang, taja pan pemutus periksa kitai manah, orang tetap enda perchaya ka kitai. Nyak meh bala cikgu enda ngasuh kitai ngaga ulah ka mayuh macam maya sekula. Semua nya ketegal sayau ka kita, ukai ketegal sayau ka sida.

Anak asi tik enda disagi,
ANANG GAGIT BEPANGAN MAYA SEKULA

Penanggur ka bangat ngacau kita sampai enda ingat ke perajar ketegal ati kelalu ka bepangan maya sekula. Kita datai ka sekula, ukai ka ngulih ka penemu tang ka ngulih ka laki tauka indu enggau bepangan. Kita bepangan sampai ngerusak pengidup diri empu. Ketegal sayau ka pangan kita sanggup ngaga mayuh macam ulah ka enda manah serta ngemalu diri empu, apai indai serta bala pengajar. Runding kita amat pandak anak, pengawa ka baka tok nadai mai penyenang ngagai pengidup kita ka dudi ari. Semua tok mina mai penusah. Ukai mimit bala anakbiak sekula ka ngaga ulah ka baka tok idup merinsa laban kelalu nitih ka ati, agi biak udah badu sekula, agi biak udah nyadi janda, agi biak udah beribun ka anak. Uji peda bansa bukai, maya agi biak maya nyak meh sida kiruh begiga ke penemu enggau pemandai dikena sida ‘ngemelik’ ka bansa kitai. Laban ka maya ari, orang idup beguna ka penemu kena ngiga duit. Tik kitai pandai ngulih ka duit tang nadai penemu ngena duit, pengidup kitai nadai meh tuju. Duit dipegai jari sejuta pan ulih abis dalam seari laban kitai senang dikemelik ka orang ka bisi penemu. Orang kaya kitai terus merinsa.

Orang indu tauka orang laki enda nemu abis di dunya tok. Maya sekula ukai maya bepangan. Umur agi panjai dikena kitai ka ngaga ulah ka baka nyak. Anang berfikir semua laki tauka indu nyau abis ‘mati’ pagila lusa. Maya umur agi biak, guna meh enggau begiga ka penemu serta pemandai sekula ngambi ka dudi ari kitai enda ngining pengidup orang. Kitai mesti nemu, orang ka pandai, orang ka kaya, orang ka bepangkat tinggi ukai ketegal Petara meri semua utai nyak ngagai sida. Sida naka ulih berusaha ngemaju ka diri empu sampai berjaya. Sida nadai beza ari kitai laban penatai sida sama meh ari Petara. Pengidup sida mungkin lebih tusah ari pengidup kitai tang siti ajak beza sida bisi juluk ati ka ngemaju ka diri baka orang bukai tang kitai bisi juluk ati ka ngenusah pengidup diri empu. Nama tuju kitai begaga ka ulah ka enda manah baka tok maya sekula? Nadai tuju ka ngengala. Kitai semina ka ngemedis serta menyati pengidup diri empu.

Jako Aba ka penudi,
SEMUA MENSIA MESTI BISI JULUK ATI TIK TINGGI

Juluk ati ka maju baka bansa bukai mesti bisi aba tiap-tiap iko kita anak. Orang ka nadai juluk ati nyak orang ka nadai tuju jalai pengidup. Kitai Iban, mayuh keresa, mayuh tanah, tebal enggau adat serta budi basa. Kita mesti bisi juluk ati ka ngemaju lalu mai semua keresa nyak nyadi ka penguntung ka bansa kitai empu. Kita mesti bisi juluk ati ka nyadi lawyer, lutor, jurutera, ahli saintis, serta mayuh agi pengawa ka menyana ngambi ka orang enda meda bansa kitai enggau sepiak mata ajak. Juluk ati ka tinggi endang manah laban kita teleba ngemanding ka pengidup kitai enggau pengidup orang bukai. Uji peda kitak Tony Fernandez, ia nyadi manager AirAsia laban la berani nangung pengawa ka bansa nyak. Pengidup ia ukai senang ari asal anti kitak maca cherita pengidup ia. Ia orang merinsa. Tang ia gigih berusaha enggau ngaga mayuh macam pengawa. Semua utai tau mai penyenang anti kitai bisi juluk ati deka ngemaju ka diri empu. Dalam pengawa bedagang, orang ka berjaya serta landik dalam pengawa dagang ukai nyak bisi pemandai tang sida berani laban bisi juluk ati ti tinggi.

Juluk ati ti tinggi deka maju tau mai pemujur, penyenang, enggau pengelantang ngagai pengidup kitai ka dudi ari. Anti nyema diato kitai diau di rumah panjai enggau apai indai, kitai mesti bisi juluk ati ka mai sida idup di negeri, meli ka sida rumah banglo, mai sida raun ngagai menua bukai serta meli mayuh macam utai dipinta sida. Ari nyak meh kitai tau nyadi anak ka manah serta menyana, idup kitai diberkat Petara belama-lama. Tang meh anak, anti kitai nadai penemu enggau pemandai, semua utai nyak enda ulih digaga kitai enggau sidak. Kitai akan ngenusah ka pengidup sida laban idup bepanggai enggau sida ari mit sampai ka tuai. Bansa kitai ukai bansa ka lemi, kitai lemi laban kitai enda ulih maju baka bansa bukai ketegal orang ka bepenemu, bisi pengelandik enggau pemandai amat mimit. Ari nyak kitai gagal bersaing enggau bansa bukai.

ANAK, INGAT KA JAKO ABA

Bansa bukai enda nulung kitai anti kitai enda serakup nulung bansa kitai empu. Tik bansa kitai terus tinggal dalam pemandai enggau perajar, bansa bukai akan ngambi kesempatan nguna kekurangan kitai nyak kena ngemaju ka bansa sida. Kitai enda ulih ngano orang anti orang ngaga kitai baka nyak laban kitai nadai daya kena ngelaban sida. Dunya diato, kitai enda ulih ngelaban orang enggau pengering bejamah, pemintar belaya, serta penguat kitai ngirup ai bisa, semua utai tok ngasuh bansa kitai rusak serta diketawa ka orang belama. Pengawa ka enggai bepeda ka pangan diri ka agi tebal dalam bansa kitai mesti dibuai abis ari ati kitai lalu tukar enggau pengawa ka beserakup serta nyukung bala ka udah maju serta bisi potensi mai penyenang ngagai bansa kitai. Kitai Iban nadai dua tiga bansa, kitai semina siti bansa ajak, taja penatai kitai enda sama endur, kitai tetap sama bansa. Ari nyak kitai enda tau enggai bepeda ka pangan diri. Pengawa ka enda manah baka tok ukai ngasuh kitai maju tang ngasuh kitai tusah begiga ka penyenang enggau pengidup. Maya besekula, besekula meh enggau naka ulih ngambi tulih ka pemandai kena ngemaju ka diri empu dudi ari ila. Maya bekerja, bekerja meh enggau naka pengerajin ngambi mudah gerah ngulih ka penyenang enggau pengeraja. Maya megai pengawa, pegai meh pengawa enggau manah ngambi ka ulih nulung ngemaju ka bansa. Tik kitai beserakup, nadai utai enda ulih digaga kitai tang anti kitai bepecah belah, sampai kiamat dunya tok kitai alu enda maju-maju, pengidup kitai diatur orang, pemakai kitai diberi orang, lalu kitai bekerja bekuli aba orang. Kasih kitai anak. Kasih kitai. Kasih meh ka aba nuan ka udah tuai tok.

Peransang ari,
Cikgu Zulkarnain Farihin
Anak Iban Katibas Song
Remaung Katibas. 
Catat Ulasan
Related Posts Plugin for WordPress, Blogger...
Related Posts with Thumbnails