LALAU ARI AKU : ANANG MAYUH JAKO, PAJU KA PENGIDUP NUAN EMPU

Dalam pengidup tu, mayuh mensia semina pandai bejako. Semua pengawa orang nadai betul peda mata sida. Penyalah enggau penyilap orang dipeda enggau terang tang penyalah enggau penyilap diri empu dipelalai ka. Rambai jako "Anang mayuh jako. paju ka diri empu" ngingatka kitai anang kelalu kiruh ka pengidup orang, anang kelalu gagit berandau ka pengurang orang tang paju ka aja pengidup diri empu. Tilik pengurang diri empu, adu ka enggau manah-manah, ngambi pengidup kitai tau berinsur manah ari sehari ke sehari.

Ketegal kelalu kiruh ka pengidup orang, bisi sekeda ari kitai, duduk bejam-jam enggau bala ka sama cap enggau kitai semina bejako ka hal enda menuku. Utai dikerandau ka berulang-ulang tang nadai mai penguntung ngagai diri empu. Ketegal ulah ka baka nyak, kerja nyau tertanggur serta nadai ngenatai ka hasil. Orang ka dikerandau ka kitai nguna jam ka bisi tiap-tiap ari ngemansang ka pengidup diri. Ketegal kelalu ka berandau ka orang sampai nyau “body shaming”,  gamal orang, buk orang, baju orang, pemesai tubuh orang nyau nyadi ka batang randau. Ulah ka baka tu enti dipajak ka, nadai sekali-kali mai pemaju ngagai pengidup diri enggau bansa.

Kitai diada ka dunya semua sama. Pengelebih enggau pengurang ditentuka kitai empu. Runding kitai mesti betul ia nyak deka mansang ke mua ngambi ka enda tinggal ari orang bukai. Anang ngerusak ka pengidup diri enggau pengawa ka nadai mai penyenang enggau pengelantang ngagai pengidup kitai. Tau kitai berandau enggau bala kaban aba kedai kopi tang utai dikerandau ubah. Berandau ka chara ngemansang ka pengidup. Berandau ka pengawa ka patut digaga dikena nambah ka pemisi ruang bilik. Berandau ka baka ni chara ngansak bala anak rindu belajar ngambi ka pandai baka bansa bukai. Tauka, berandau ka chara ngemansang ka rumah panjai ka endur kitai diau. Randau ka betul tau mai pemujur serta pemansang ngagai pengidup.

Kitai mesti berunding baka ni chara ngemaju ka diri empu. Anang bejako kelalu mayuh enti utai enda menuku serta nadai tuju. Semua mensia enda menyana. Penyilap orang ambi nyadi ka lalau ngagai diri empu, ukai utai ka patut diketawa. Pengurang orang ambi ka banding enggau pengurang kitai empu awak ka kitai makin menyana ari sehari ke sehari. Petara enda tinduk meda pengawa enggau ulah kitai. Orang ka enda mantul ati serta bagas ngereja pengawa sigi diberkat Petara. Ari nya pengidup sida nadai penanggor, mudah gerah utai ulih. Taja enda kaya tang nadai utai kurang ba pengidup sida. Orang ka mayuh jako, kiruh ka pengidup orang, rindang belama-lama enggau ulah ka baka nyak datai ka runding pan nyau enda betul. Pengujung ia, sida nadai utai ulih. Pengidup nyau jengap-jengap laban semua utai digaga enda datai ba pengujung ketegal jam mayuh tebasau.