CATATAN DALAM BAHASA IBAN : PENEMU CIKGU ZULKARNAIN : MIMPI KELALU TINGGI TANG NGELUSU NGIGA PEMANDAI

 

Kitai selalu temagah ati maya bercerita ka orang bisi pemandai. Kitai bejako ka pemintar enggau pemendar ia ngiga pemandai datai ka bulih pemujur dalam pengidup. Pemandai tok sigi mula ari penemu tik diulih kitai maya sekula. Ari nyak apai indai kitai bekeradai nyekol ka kitai ngambi ka kitai bulih pemandai. Sida enggau naka ulih nyukung kitai buji tudah udah nadai peluang laban ka udah jauh tinggal di belakang dalam pengawa begiga ka pemandai ketegal ka idup aba menua ulu. Aku selalu sinu enti ngingat ka niang apai enggau niang indai ka selalu miring ka jari, sandau ari lalu begawai ka aku maya nurun sekula munya. Nyak meh tanda apai indai kitai besai amat pengarap nganjung kitai ka sekula.

Aku nemu semua anakbiak nemu nama tuju sida ke sekula. Sida nemu nama penguntung orang ka bisi pemandai. Sida pan bisi juluk ati tik tinggi deka nyadi orang tik landik, bisi penemu, ngemuan pemintar lalu bulih pemandai. Tang meh, aku selalu meda bala anakbiak selalu alah enggau penguji maya besekula. Penguji tik balat ngasuh sida rarat datai ka nyau tebasau jam ngiga penemu ia nyak pengawa gila bepangan. Agi biak (umur 13 -17 taun) udah kiruh begiga ka sulu datai ka nyau belaki bebini maya agi biak. Pengawa ka kelalu berumban belaki bebini sebedau tulih ka pengidup tik menyana tok balat amat masau anak bansa kitai berebut ngulih ka nalan tauka peluang berajal ngagai tikas tinggi enggau bansa bukai tik udah jauh maju. Enti sida likun napi pengidup enggau penguji berumahtangga nyak manah tang ke mayuh agi udah 2 tauka 3 taun jadi udah bisi rita sarak maya udah bisi anak. Tok meh utai ka balat ngacau anak bansa kitai ngiga pemandai.

Pengidup tik kelalu rindu deka bemain enggau muai masa ngaga pengawa tik enda menuku pan siti ari penanggur kitai ngiga pemandai. Enti kitai meda, anak bansa kitai agi mit udah nemu enggau orang ngirup ai bisa, nginsap tauka bejudi. Maya bisi pengerami, hal ka baka tok nadai bisi orang ngerara tang dipuji bala mayuh enti sida ulih ngabis ka sebotol tauka semangkuk ai bisa (One go langgak) ko sida rumah panjai. Pengawa ka baka tok tau ngerusak untak anakbiak lalu ngujung ka sida nyau semun pengingin ati deka ngiga pemandai. Tang enti bisi orang ngerara tauka deka ngemetul la utai tok, mayuh gak bala apai indai ensiban ati. Sida enggai ninga penemu tik badas dikena ngemutar ka ulah anak sida. Penyiru ati ka anak tau ngasuh sida ngelaya orang ka badas ati deka nulung ngajar anak sida.

Anak ka udu ditanah ka nuan maya ngaga penyalah ketegal nuan nangi ka diri malu nyak meh ngenusah nuan dudi ari ila. Anak tik kelalu dikesayau ka nuan datai ka beambis duit enggau beambis ati bebeli ka mayuh macam utai berega nyak meh ka ngemai nuan umang dudi ari ila enti salah chara nuan ngajar ia. Jauh ka ngemai nuan senang, suah di peda ia nipu nuan lalu ngemula ka nuan datai ka nuan nyau nadai daya agi ngubah ulah enggau perangai ia. Tok meh utai ka tau sama-sama kitai peda enggau silik enggau lansik maya ka ngiga jalai tik lurus ngulih ka pemandai. Salah mimit chara kitai tau ngasuh jalai pengidup bala anak rusak datai ka belama ia. Jako tok ukai reti aku nemu-nemu ngemansut ka  penemu, tang sama-sama meh kitai berunding ngambi ka kitai ulih mansang ke mua nitih ka bansa bukai. Anang orang mansang kitai majak nyurut ka diri laban ka alah bulu ari orang ka jauh bisi pemandai ari kitai.

Ngiga pemandai enda tusah tang kitai mesti berani ngubah pengidup ka diato. Siti ari pengawa ka cukup badas dikemuan tik amat deka ngiga pemandai ia nyak pengawa rindu maca bup. Enti ari mit kitai mai bala anak likun maca dalam kandang sejam tauka dua jam sehari, lama-lama pengawa ka baka tok nyadi batang pengawa ka dikerindu maya lepa. Kelimpah ari nyak sukung ngagai anak tik besekula mesti cukup. Anak kitai nyak meh reta tik pemadu manah diberi Tuhan ngagai kitai. Ibun meh anak enggau manah. Maya ia ngaga ulah tik enda manah nuan ngajar ia enggau ulah tik betul ngambi ia nemu reti adat enggau basa. Anak tik cukup intu apai indai sigi senang ngiga pemandai.