Udah Bulih Pemutus Periksa SPM Ka Mujur Terus Nyambung Pelajar, Anang Badu, Semadi Enda Ulih Nadai Ko Jako, Giga Meh Jalai Ka Bukai

Aku selalu madah ngagai bala anakbiak ka diajar aku, enti sida udah bulih pemutus periksa ka manah, terus ka pelajar laban umur agi biak. Anang badu ngapa. Aku mega selalu bepesan enti nerus ka pelajar anang milih sengapa, minta tolong bala cikgu milih kursus ka manah serta cun enggau pemutus periksa ka diulih sida. Aku nyamai ati laban sida selalu ninga jako taja sida ukai anak aku empu tang ketegal kasih aku nadai kala belampong ati bekunsi cerita ngambi tau nyadi ka cuan sida nerus ka pejalai pengidup. Sekandang ka diato, nadai ga sida enda ninga jako, sida selalu nanya ni ka manah lalu ni ka betul. Lebih ka meda sida endang mujur bulih kerja pengudah ngabis ka pelajar aba tikas degre aku berasai gaga ati. Taja sida ulai anak ada tang laban ka udah kelalu lelak nyedia ka sida ngambi bulih ka pemutus periksa SPM ka manah, aku enggau bala cikgu ka bukai sigi enda lembau bepesan. 

Bisi bala anakbiak aku madah, enda pandai ulih meh idup Cikgu Zul. Ila kami kerja ke laut. Aya aku nadai meh sekol, tang ia mayuh duit, ulih meli Hilux. 

Aku enda kala madah penemu sida salah tang aku madah laban aku nemu runding sida agi runding anakbiak, enti nuan udah belajar 11 tahun ari darjah satu datai form lima, udah nuan bulih pemutus periksa SPM ka manah, nuan enggai nerus ka perajar, badu tauka kerja, manah agi gak nuan badu tumu ari suba. Aku selalu ngajar sida, sigi amat orang ka bulih utai lalu kaya ukai semua bisi pelajar ka tinggi tang enti nuan bisi diploma tauka degree, cara nuan berunding ka pejalai pengidup diri empu tau lain mimit laban penemu ka diperajar ka nuan tentu ulih dikena nuan ngemansang ka diri empu enggau diri sebilik. Aku enda madah orang ka enda tinggi perajar pandak runding. Anang salah sangka. Maya aku pulai pemisi ka rumah panjai, aku ngiga penemu enggau semua orang laban penemu sida aba utai bukai jauh lebih manah ari runding aku. Ambi ka banding, maya ka manduk asi pulut di tebing ia, aku berajar enggau sida cara ngidup ka api, cara masuk ka beras pulut, cara naing ruas beras pulut, serta enggau mayuh macam utai ka bukai.

Peluang orang ka tinggi perajar enggau ka nadai nasib ulih nyambung pelajar ketegal pil aba pom 5 ke dudi ari sigi sama. Orang ka mujur enggau enda mujur dalam pengidup mayuh bepangai aba diri empu. Tang kitai anang nyangka utai tok tau sama sekandang tempoh 10 tahuka 20 taun tik deka datai. Dunya diato kelalu jampat berubah, lalu kitai sigi beguna ka penemu ka dipelajar ngambi ka kitai ulih mansang ka mua enggau lebih manah. Aku enda nemu leju ngelalu bala anakbiak aku, pilih meh jalai enggau betul laban jalai ka dipilih nuan udah nuan ngambi pemutus periksa pom lima, nyak meh nyadi penentu pengidup nuan tik deka datai. Aku laban ka nadai bisi kala ngasai ka pengidup ngelaung ka pelajar pengudah pom lima sigi madah lalu ngansak bala anakbiak ka diajar aku nyambung pelajar ka tikas lebih manah agi. 

Uji kitai meda bansa enggau menua orang ka udah maju endang selalu ngemerat ka pengawa sekula laban sida nemu penemu ka diulih ari sekula amat beguna dikena kitai jemah ila. Pelajar sekula sigi beguna ngagai kitai semua. Seagi-agi bisi peluang, terus ka pengingin ati deka belajar datai ka tikas degree, master, enggau PHD. Aku minta ampun ngagai sida ka udu ngeracun penemu bala anakbiak enggau jako ka munyi tok;

“Belajar tinggi pan empai temu nuan bulih kerja. Semina ngayah ka duit apai indai. Enti nuan bejual online pun bulih duit beratus-ratus ribu baka sida Youtuber. Nuan jual perengka kena nganta aja aba Shopee pan bulih RM300.00 sehari." jako sida nimbal. 

Jako ka munyi tok endang amat tang ukai semua ka betul-betul mujur nyadi Youtuber enggau TikToker kelebih bansa kitai. Laun tauka dudi, ujung-ujung nuan beguna ka pemandai sekula ga kena minta kerja. Laban aku ka cikgu, aku selalu nerima mesej tauka talipaun ari orang ka udah badu sekula 5 tahun datai 10 tahun udah, minta Sijil Badu Sekol. Sida madah kena minta kereja laban diato minta kereja beguna ka Sijil SPM tauka. Mayuh agi cerita ka bukai senentang enggau pengawa ka enggai nyambung perajar ketegal ka salah runding maya agi baik tang munyi ko jako sempama, nesal nadai ka datai sebedau kitai mutus ka runding tang nesal dapat maya kitai udah mutus ka runding lalu udah ngagai ka penusah nitih jalai ka salah. Aba penemu aku, anang badu berajar seagi-agi bisi peluang kelebih agi maya umur kitai agi biak. Jako orang kiba kanan sigi mayuh. Penemu siko-siko sigi mayuh. Jako enggau penemu orang kelebih agi orang ka segulai peniau enggau kitai sigi bisi nyangkut aba ati tang kitai tau nanya orang bukai dulu enti kitai nyau sekut dalam milih jako ni ka patut dititih, penemu ni ka patut dipilih. Peda meh pemujur bansa orang ka udah maju jauh ari kitai aba perajar sekula. Sida meh megai penatai pemisi dunya. Sida udah jauh ninggal ka kitai. Udah jauh nyingkang ari kitai. 

Ari nyak anang meh berunding, nadai guna nyambung perajar udah SPM. Enti nadai guna, nama meh kebuah bala apai indai nyau beambis duit ngansak anak sida berajar ngambi ngulih ka pemutus periksa ka manah. Nama kebuah perintah tauka kompeni nyedia ka tulung serta bantu ngagai anakbiak ka bulih pemutus periksa ka manah lalu nganjung sida berajar ke luar negeri. Aku empu, selalu diansak bala apai indai ngajar anak sida bebayar sebedau ari sida ngambi periksa SPM, ngambi ka bulih A+. Bala apai indai bansa tok (Ukai bansa kitai Iban) sanggup mayar tuisyen anak RM100 datai RM300.00 sebulan bagi siti subjek ngambi ka anak sida betul-betul sedia sebedau ngambi SPM. Nama kebuah? Sida nemu perajar sekula endang beguna ka anak sida. Tunda meh penemu sida. Anang salah sangka, aku enda  nganu sapa-sapa. 

Enti penemu aku betul, titih ka. Enti salah, enda ibuh diguna. Tang ketegal penyayau aku ka bansa diri empu kelebih agi bala menyadi enggau bala kaban ka ngelala aku nyak meh aku ngemansut ka penemu baka tok. Aku enda minta puji, jauh sekali deka madah ka utai ulih diri empu, tang aku deka ngigat ka bala anakbiak ka baru udah bulih pemutus periksa SPM, enti nuan salah pilih jalai ka ditujah sari tok, nuan deka nikal pulai baru ila enda mudah. Anang ketegal jako orang nuan nyau salah singkang pengidup. Enti nuan labuh, enda sida megai jari ngangkat ka nuan baru. Enti nuan teterap, nadai sida berumban niri ka nuan baru. Nuan meh ka besai tanggungjawab ngagai nuan empu, ukai orang bukai.