PENEMU CIKGU ZUL (BAHASA IBAN) NEMU-NEMU MEH NUAN NYUKAT BAJU BA TUBUH NUAN EMPU

 

Perkara ka selalu nyadi aba pengidup kitai ka maya ari, kitai selalu idup ngelui ari pemisi diri empu. Kebuah pia kitai selalu makit diri enggau orang bukai. Kitai enggai alah lalu enggai ngalah ka diri. Nyema ka banding, enti kitai meda orang ka dipakit kitai nyak ngena meli kereta Honda CRV kitai pan meli kereta ka lebih mar agi ari engo ia. Tang kitai meli nadai tuju-tuju. Kitai meli semina enggai ka diri dipeda alah ari ia. Udah nyak buk nyau abis tusut begiga ka duit dikena bebayar ka utang tiap-tiap bulan. Orang ka dipakit nuan, kada nemu nuan makit ia deh. Penusah pulai ka nuan lalu ia idup meruan baka selama. Mensia ka nadai untung-untung ia nyak mensia ka makit orang ari belakang lalu orang ka dipakit ia enda ngelala ia tauka enda ibuh ka ia. Utai ka baka tok nyadi laban kitai nipis pengarap ka Tuhan datai ka kitai nyau rindu nitih ka runding tik salah, ia nyak runding ka ngenusah diri empu.

Bisi gak sekeda mensia, enda makit orang enggau pengeraja tang meri orang jako jai ketegal orang merinsa tauka beli ba mata ia. Ia ngasai ka diri udah cukup aba semua perkara lalu ia peneka ati nyembur orang enggau leka jako meda orang ka enda ngelaban tauka enda nimbal ia. Mensia ka baka tok suah dipeda bebali pengidup. Ia nemu pengidup tok baka tayar, bisi maya nuan ba atas lalu bisi maya nuan aba baruh tang ketegal kelalu sombong laban ka udah jauh ninggal ka orang, ia nyau enda ingat ka asal penatai diri empu. Semua kaban belayan ka dibaruh ia jai magang dipeda ia laban nyau enda sebanding agi enggau ia. Kaban belayan ka idup menyana ka ia meda tang ia enda nemu orang begulai enggau ia semina ngelakon diri aja. Udah ia labuh baru ia nemu ni langit tok tanah.

Kitai ulih idup enggau lantang enti kitai ngelala sapa diri kitai empu. Anang ngelui ari utai ka ulih kitai empu. Orang enda meda nama jenis kereta dikena nuan tang orang meda baka ni nuan ulih ngatur rumah tangga, bini, enggau anak nuan enggau manah. Semua mensia udah diatur Tuhan enggau manah jalai ngiga pengidup, adu ka diri enggau badas, anang menyati pengidup diri empu. Pengidup tik nyamai ia nyak pengidup tik serekun lalu cukup semua utai. Enti kitai enda ulih meli rumah dua tingkat, kitai meli rumah setingkat. Orang ka begulai enggau kitai ketegal pemanah enggau basa kitai ukai ketegal berapa tingkat rumah dibeli kitai. Enti orang datai ka rumah kitai, orang berati ka pemersi rumah kitai ukai meda berapa rega sofa tauka semua utai ka bisi aba rumah kitai. Enti kitai ulih nadai salah tang anang majak ka diri ulih enti ke bendar nuan enda ulih.

Tok semina penemu aku. Nadai sangkut paut enggau sapa-sapa. Penemu maya ngirup kopi. Enti salah aku minta ampun. Enti betul ambi ka lalau pengidup. Ngajar kitai ngajar aku meda laban kitai mensia sigi enda ulih kelalu manah nguan dunya. Penyilap sigi bisi, ari nyak kitai mesti ninga penemu ari orang bukai ngambi ka kitai ulih  meda penyalah diri empu lalu ngubah utai nyak nyadi betul.